Nuummi Ladies Circle meeqqanut ikiortarialinnut katersuiniassapput
Hotel Hans Egede peqataasumut ataatsimut Meeqqat Inuunerissunut 50 kr.-inik tunissuteqartassaaq, aamma suliffeqarfiit assigiinngitsut amerikamiutut eqquiniaasitsinissamut pinnattaassanik tunissuteqarsimapput sinneqartoorutillu tamaasa Meeqqat Inuunerissunut tunniunneqassallutik. Charity Dinnerimut aqagu ingerlanneqartussamut peqataaneq 550 kr.-eqarpoq. charitydinner72@gmail.com-imut allalluni peqataaniarluni nalunaartoqarsinnaavoq.
-Ladies Circlemi siulittaasutut taamatut aaqqissuussisinnaanerput tanngassimaarutigaara, Ladies Circlep taamatut aaqqissuussinerisa siullersarimmassuk. Aaqqissuussinermut suleqatigiit piffissaq annertooq nukippassuillu atorlugit unnummik nuannersumik Meeqqat Inuunerissunullu tunissuteqarnissamut piareersaasimapput, Ladies Circlemi siulittaasoq Britta Keldsen oqarpoq.
Qujanartumillu suliniaqatigiit inunnit pikkorissorsuarnit arlalinnit tapersersorneqarput. Taakku ilagaat Mudi Berthelsen juullimut ammartakkamit Nissineersoq, aliikkusersuisut akunniliisussaattut akuersisimasoq, aliikkusersuisartullu nipilersortartullu Hans Jukku Nukannguarlu kiisalu Angu, aliikkusersuiumaarput. Tamatuma saniatigut filmiliortartut isumalluarnartut Aka aamma Malik Tumit Productions pillugu saqqummiissapput, Nuuk Couturemiillu Louise Lynge Hansen Nunatsinni atisanik siullerpaamik takutitsissalluni.
-Ladies Circlemi pingaarnertut anguniakkat ilagaat ajunngitsuliornermut atugassanik katersuiniarnissaq. Nuummi Ladies Circle ukiut tamaasa ilaasortat akiliutaasigut aaqqissuussinerillu aqqutigalugit katersuiniartarput, ukiormannalu Charity Dinnerimik aaqqissuussiniarluta toqqarsimavarput, nuannersumik aliikkutassaqartitsillutalu unnussiuaaqatigiisitsissalluta. Katersuiniarnermut taama amerlatigisut tunniussaqarusussimanerat nuannerluinnarpoq, Britta Keldsen oqarpoq.
