Nuummi kalaalimineerniarfiup naatsorsuutai amigartut
Nuummi kalaalimineerniarfik AG-mi allaaserisami amigartooruteqarfiusupilussuartut allaaserineqarpoq. Qaammammut 300.000 koruuninik amigartooruteqarfiusartoq Kommuneqarfik Sermersuup naatsorsuutimini allaaseraa. 2012-imi ilanngaatissat peereerlugit 3,6 mio. koruuninik aningaasartuutaasimanera aamma paasissutissiissutigineqarpoq.
Amigartooruteqartarnermut pissutaanerpaasoq tassaavoq kalaalimineerniarfimmi tunisanit iluanaarutaasartut ikippallaarneri. Tamannalu aalisartunut piniartunullu isumaqatigiissutaasimasunik ilaatigut peqquteqarpoq.
Kalaalimineerniarfimmik ulluinnarni aqutsisup Andreas Kleinschmidtip ukiuni naatsorsuuseriffiusuni kingullerni marlunni sooq naatsorsuutinik tunniussisoqartarsimannginnera nassuiaatissaqartinngilaa kommunimullu innersuussilluni.
-Kalaalimineerniarfiup naatsorsuutaanik tunniussisoqarsimanngilaq, kina tamatumunnga akisussaasuunersoq assortuussutaasimammat. Kalaalimineerniarfik pilersinneqarmat piniartut peqatigiiffiinit ingerlanneqalernissaa anguniagaasimagaluarpoq. Tamannali suli pisimanngilaq, taamaattumillu kommuni "naatsorsuutaasanik" 2011-mi 2012-imilu akisussaaffigineqarumanngitsunik ullumi ingerlataqarpoq, aningaasaqarnermut pisortaq Mette Kessel AG-mut nassuiaavoq. Naatsorsuutit kommunimit piaarnerpaamik iluarsiivigineqarnissaat neriorsuutigaa.