Nuummi inuusuttunut meeqqanullu ornittagaqalertoq

Nuummi meeqqanut inuusuttuaqqanullu ornittagaq ulloq unnuarlu ammasartussaq

apriilip 29-anni ammarpoq. Taanna meeqqanit inuusuttuaqqanillu angerlarsimarusunnatik silamiiginnartartunit kialaarfigineqarsinnaasoq, Kommuneqarfik Sermersooq allappoq.

Kommuneqarfik Sermersooq suliniut ”Toqqissisimanissaq pillugu angalaaqatigiinnik” taasamik februaarimi pilersitsipput, taakku unnukkut illoqarfimmi angalaartarput.

Ulluni akissarsiffiusuni sapaatillu akunnerisa naaneranni meerarpassuit inuusuttorpassuillu illoqarfimmi tarfisut takussaasarput, taammatoqartarneralu peqqutigalugu Kommuneqarfik Sermersooq ornittakkamik maanna ammaavoq.

- Piffissat ilaanni meeqqat angerlarsimarusunnginneranni ikiorlugit isumaginissaat pisariaqarluinnartarpoq. Meeqqat unnuakkut illoqarfimmi tarfisarnerat atornerluilertarnermik imaluunniit pinerluttuliortalertarnerannik kinguneqarsinnaasartoq misilittakkat takutippaat,” Meeqqanut Ilaqutariinnullu Ingerlatsivimmi pisortaq Martha Lund Olsen tusagassiiutinut nalunaarummi allappoq.

Ornittagaq ullut tamaasa nalunaaqutaq unnukkut arfinermiit ullaakkut nalunaaqutaq arfineq-pingasut tungaanut ammasassaaq.

Inuusuuttuaqqat kissartunik nerinissaminnik inulerinermillu sulialinnit ilitsersorneqarnissamik periarfissaqarput. Aamma meeqqat angerlarsimaffimminnut angerlarsinnaanngitsut ornittakami unnuisinnaanissaat periarfissaavoq.

Ornittagaq Nuummi Farip Aqqutaa 10-miippoq.