Nuummi ilinniarnertuunngorniat 77-it ullumi naammassipput

Nuummi Qeqqata Ilinniarnertuunngorniarfiani ukioq manna allagartartaartussat aatsaat taama amerlatigipput. Ilinniartuungortunngortussat katillugit 77-iupput, rektorimiillu Minihalimi ullumi allagartartaartinneqassallutik.
Allattoq Mads Lynge
juunip 24-at 2009 11:19

Ilinniarnertuunngorniarusuttullu ukioq manna aallartittussat aatsaat taama aamma amerlatigissapput, atuaqatigiiaat arfineq-marluk ukioq manna aallartissammata.

Meeqqat atuarfianni 11.klassip siorna atorunnaarsinneqarnera ilaatigut pissutaalluni ukioq manna aallartittussat amerlanerusussat, Qeqqata Ilinniarnertuunngorniarfiani rektori Henning Ditlevsen Radioaviisimut oqarpoq.

Inuusuttulli ataatsimut isigalugu amerlanerusut ilinniarnertuunngorniarusunnertik pissutigalugu ukioq manna qinnuteqarsimasut taassuma aamma ilimagaa.

Namminersornerup atuutilersinneqarnera rektorip Hennng Ditlevsenip ilinniarnertuunngortunut oqalugiaateqarnermini ilaatigut assersuutigaa. Ilinniarnertuunngornertik pissutigalugu ilinniartut annertunerusumik namminneq aalajangiisinnaassuseqalernerarpai, soorlu aamma Kalaallit Nunaat Namminersulernermini taamaattoq.

Karakteriginnerpaat pingasut NunaFondeniminngaanniit pisarneq malillugu akissarsitinneqassapput. Ilinniarnertuunngortut pingasut Qeqqata Ilinniarnertuunngorniarfianit aamma akissarsitinneqarumaarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq