Nuummi coronavirusimik tunillatsittoq ataaseq paasineqarpoq
Nuummi inuk ataaseq nappaamik coronavirusimik tunillatsissimavoq.
Tunillatsittoq tunillatsissimasunit ilisimaneqareersuneersuuvoq, taamaammat tamanna tupinnanngilaq.
Taamaammat najoqqutassat maleqqissaarneqarnissaat piingaaruteqartoq nakorsaaneq oqarpoq, imalu nangilluni:
- suli tuniluuttoqarpoq, taamaammat najoqqutassat tamatta maleqqissaartariaqarpavut, soorlu inunnut akulerunnaveersaarneq, eqqiarluartarneq napparsimalersimagaannilu angerlarsimaannarneq. Piffissami matumani tuniluuttoqarneranik pitsaaliuiniarnerput pingaaruteqarluinnartuuvoq” Nunatta nakorsaanera Henrik L. Hansen oqarpoq.
Tunillatsissimasoq kingulleq paasineqarneratigut, coronavirusimik tunillatsissimasut Nuummi aqqanilinngorput
Taakkunannga sisamat napparsimajunnaarsimapput tunillatsissimasunilu peruluttoqarani, Naalakkersuisut taama allapput.
Ullumikkut misiligutit taamak amerlatigisut akissuteqarfiginerannut ulluni arlalinni misiligutissat ataatsimut misissorneqarsimanerat pissutaavoq. Inuit katillugit 625-t misissuiffigineqarsimasut, Naalakkersuisut tusagassiuutinut nalunaaruteqarlutik taama allapput.