Nuummi Blok 23-mi naqqup-ataani ikuallattoq: Najugaqartut qimagussortinneqarput
Siusinnerusukkut allaparput blok 18-imi blok 23-milu najugaqartut qimagussorneqartut. Tamanna kukkuneruvoq maanna naqqipparput blok 17 aamma blok 23 pineqarmata.
Nuummi pingasunngornermi ualikkut ikuallattoqalerneranut atatillugu Blok 17-imi Blok 23-milu najugaqartut qimagussortinneqarput.
Kalaallit Nunaanni politiit pingaartuisa pisortaat, Julie Senderovitz-Bendtsen oqarpoq.
Taassuma ajoqusertoqarsimaneranik nalunaaruteqartoqanngitsoq paasissutissiissutigaa.
Blok 23-mi naqqup-ataani ikuallattoqarpoq, sumiiffimmit assikkut inissiaqarfimmit qasertumik taartumik pujornera takuneqarsinnaavoq.
Inissiaqarfiit marluk nunap iluatigut ruujorikkut ataqatigiipput, taamaammat inissiaqarfinni taakkunani marlunni najugaqartut qimagussortinneqarnissaat politiit aalajangerpaat. Blok 17-imiimmi pujoqarnissaa aamma pinngitsoortinneqarsinnaanngilaq.
Politiit qatserisartullu sumiiffimmi pingasunngornermi ualikkut najuupput, nalunaaqutarlu ualikkut sisamanngunngitsiartoq bussit qassiiusut sumiiffimmut takkupput, ineqartut taamaalillutik bussini kissassimaarsinnaatinneqarlutik.
Politiit pigaartuisa pisortaat paasissutissiivallaanngilaq, sumiiffimmiittunulli kajumissaaruteqarluni:
- Inuit alapernaatsut ungasillisaarnissaat anorillu sammivianiinnginnissaat innersuussutigaarput, Julie Senderovitz-Bendtsen oqarpoq.
Politiit qatserisartullu sumiiffimmi suli suliaqarput.