Nuummi biilinik ajutoornermi inuusuttut marluk ajunaarput
Inuinnaat biiliat inuusuttunik tallimanik ilaasulik Nuummi mittarfiup tungaani Ilimmarfiup nalaani ullaaq arfineq pingasup qaangilaaraa ajutoorpoq. Arnaq inuusuttoq 20-inik ukiulik angullu 29-inik ukiulik ajunaarput, angutillu inuusuttut pingasut allat ajoqusernerminik Dronning Ingridip napparsimmavissuani suliarineqarput.
Allattoq Jens Thorin
juunip 27-at 2009 12:02
Nuummi politeeqarfiup ittorigallagaa, Johan Davidsen naapertorlugu, Toyota Corolla qorsuk qaamasoq pineqartoq sukkavallamik ingerlaarsimagunarpoq.
- Politiit misissuigallarnerisa ilimanarsisippaat, biili mittarfimmiit illoqarfiup tungaanut sukkaqaluni ingerlasimasoq, aquttuatalu biilit aqussinnaajunnaarlugit ajutoorluni, Johan Davidsen oqarpoq.
Ajutoornermik takunnittoq politiinut oqaluttuarpoq, biilip Siaqqinermi ajutuunngitsiarnermini sukkaqaluni biilit allat marluk illuanut ingerlaartut naapissimagai. Politiit taamaammat biilit taakkua marluk ingerlatsisui oqaloqatigerusuppaat, taakkualu 32 14 48-imut sianeqquneqarput.
