Nuummi, Atammimmi Kangaamiunilu covid-19 tuniluuteratarsinnaasoq

Nuummi inuit marluk covid-19-imik tunillatsissimasut ippassaq unnukkut paasineqarpoq, qanorlu tunillanneqarsimanersut suli ilisimaneqanngilaq.

-Nuummi tunillaassuunerup pilerfia ilisimaneqanngitsup tunillaassuuttoqatarsinnaanera paasinarsisippasippaa, Nakorsaaneqarfik tusagassiuutinut nalunaaruteqarpoq.

Tunillatsissimasup aappaa Atammimmiillunilu Kangaamiuniissimavoq, taamaammallu nunaqarfinni taakkuninnga innuttaasut misissortinnissaannik kaammatorneqarput.

AAMMA ATUARUK Coronamik pingasut tunillagaasut: Marluk Nuummi ataaserlu Qaqortumi

Taassuma saniatigut Nuummi kikkulluunniit aamma aqagu misissortinnissaq periarfissaassaaq.

Inunnut tunillatsissimasunut qanillisimasut ulluni arfineq marlunnik angerlarsimaannarnissaanik peqquneqarput, ullullu taakku qaangiuppata PCR atorlugu misissortissallutik. Qanillisimasut ulluni 14-inik covid-19-imut ersiuteqalissanerlutik maluginiassavaat.

Innuttaasut inunnut allanut sapinngisamik attaveqarnaveersaarnissaat oqartussat kaammattuutigaa.

- Inuit tamarmik inunnik allanik attaveqarnerat annikinnerpaamiitinnissaa kaammattuutigineqarpoq, taamaaliornikkut tunillatsissimasumut qanimut attaveqartut ikinnerpaaffissaaniitinniarneqarmat.

- Ilutigalugu innuttaasut tamarmik ersiutit immikkut eqqummaariffigissagaat kiisalu nalinginnaasumik innersuussutit malissagaat kaammattorneqarput,nakorsaaneqarfik allappoq.

Aajukulu innersuussutigineqartut: Qanillinaveersaarneq, assaat asakulanissaat, tallip peqittarfianut tangajortarnerit kiisalu covid-19-imik ersiuteqartilluni imaluunniit tunillatsissimasumik attaveqarsimagaanni angerlarsimaannarnissaq misissortinnissarlu kaammattuutigineqarlutik.

Nunatsinni tunillatsissimasut maanna 21-upput. Ilulissani ataaseq, Sisimiuni arfinillit, Nuummi pingasut, Narsarsuarmi marluk, Narsami ataaseq, Qaqortumi arfineq-pingasut.