Nuummi aqquserngit manissarneqartut

Asfaltilersuisut sila nillerteqqilersinnagu ulappusertarput. Asfaltimik siammarterummi sukkavallaanngikkaluami aquttoq, Svend Møller, ulluinnarni GT-mik taaneqartartoq, ukiuni 30-nngulersuni asfaltilersuisareerpoq. Eqqumaffigisassallu nalunngilluarpai.

- Sorparujuupput. Nunamiittut maanngaanniillu tamaasa takusinnaavakka susoqarnersoq, GT taama oqarpoq.

Aqqusineq kiliortorneqareeraangat GT suleqatinilu asfaltilersuinerminni angallattut silalu eqqumaffigisarpaat.

- Ajoqusersuinaveersaarluta ingerlasarpugut. Kisianni apeqqutaasarpoq siallinnginnersoq siallernersorluunniit, siallertumimi asfalterisinnaaneq ajoratta, GT oqarpoq.

Asfalti 180 gradinik kissassusilik

Asfalti atorneqartartoq nunatsinnut tulluarsagaavoq, ukiullu 15-it kingulliit missaani atorneqartarluni.

Asfalti Nuummi asfaltiliorfimmi sananeqareeraangami siaruarterneqarsinnaanngortarpoq.

Sanassatilluguli mianersorfissaqartarpoq.

- Asfalti sananeqaraangami 180 gradit missaaniittarami uunnginnissaq pingaartorujussuuvoq, soorlu asfaltfabrikkimi, asfaltilerisut tamarmik imminut mianersuuttussaapput. Ulorianartuuvormi, Kommuneqarfik Sermersuumi aqqusinermi sulisut aqutsisuat Søren R. Christensen taama oqarpoq.

Aammali biilerlutik angallattut mianersornerullaquneqarput.

- Sulisukka aqqusinermut biilertunullu qanittupilussuugamik aamma tunoriarsinnaagamik, taamaattumik biilertut piareersimasussaapput sangunissaminnut, Søren R. Christensen.

GT uterfigeqqilaariartigu. Taassumami sulinermini naammasisani nuannaarutigisaqai.

Inuusuppallaarunnaareeraluarlunilu suliunnaarnissani suli eqqarsaatigivallaanngilaa.

- Naluaraluunniit qassinik ukioqaleraangamik pensionertartut. Uanga utoqqarpasinngilanga, aatsaat 63-inik ukioqarpunga, GT oqarpoq.

Nuummi asfaltilerisut aqqaneq-marluusut qaammatit marluk missaani asfaltilersuisarput, ullormullu 250 tonsit tungaanut siaruarterneqarsinnaasarluni.