Nuuk - Sinerissap sinnera 5-0
IA-p qinigassanngortitai taamaalilluni Siumup qinigassanngortitaannit ataatsimik sinerissaminngaanneersortaqartunit allaanerussuteqarput. Aammami Atassutip qinigassanngortinniakkatik Nuummeersuinnaanatik sinerissamit tamarmeersuunissaat ilimasaarutigereerpaa.
Kuupik Kleistip qinigassanngortitatik tamarmik Nuumminngaanneersuunerat uggornartuunerarpaa.
- IA-mi periuserivarput qinersisoqassagaangat immikkoortortaqarfigut kajumissaartarlugit qinigassanngortitassaminnik inassuteqaqqullugit. Tamakkualu inassutigineqartut siulersuisuunernut apuunneqaraangata siulersuisuunerit aalajangertarput kikkut qinigassanngortissanersut, oqarpoq.
Tamatumuunali qinigassanngortinneqartut tamarmik Nuumminngaanneerput.
- Soorunalimi uggornarpoq Nunap sinneraninngaanniit qinigassanngortittoqanngimmat. Kisianni uku qinigassanngortinneqartut ugguaatissaanngilluinnarput, Kuupik Kleist erseqqissaavoq.