Nuuk Nordisk Kulturfestivalip pilersaarutini saqqummiuppai

Kalaallit aamma nunani avannarlermiut 90-nit amerlanerusut eqqumiitsiliornikkut sapaatip akunnerani pikialaarfiusartumi peqataaassapput.
Eqqumiitsuliortut 90-init sinneqartut kulturikkut pikialaartitsineq sapaatip akunneri sisamat qaangiuppata peqataaffigissavaat. Asseq 2017-iminngaanneerpoq. Assi © : Nuuk Nordisk Kulturfestival
Allattoq Kathrine Kruse
septembarip 17-at 2019 18:30

-  Nipilersorneq, isiginnaartitsineq, eqqumiitsuliorneq, saqqumersitsinerit, atuakkat, pikkorissaaneq allarpassiullu qilaanaarutigikkit.

Taama Nuuk Nordik Kulturfestivalimik, Nuummi 2015-imit ukiut allortarlugit ingerlanneqartartumi, aaqqissussuisut tusagassiuutinut nalunaaruteqarlutik qilanaartuusiipput.

Nuuk Nordik Kulturfestivalimimmi ukioq manna aaqqissuisut eqqumiitsuliortut nunani avannarlerneersut 90-init sinneqartut kulturikkut pikialaartitsineq sapaatip akunneri sisamat qaangiuppata aallartippat peqataasussatut qulakkeersimavaat.

Eqqumiitsuliortunit 90-init sinneqartunit, pikialaartitsinerminilu sapaatip akunnerani ingerlanneqartussami peqataasussani affaat eqqumiitsuliortuupput kalaallit, soorlu Jessie Kleemann, Da Bartali Crew, Makka Kleist, Karina Møller, Tarrak, Alexander Montgomery-Andersen allarpassuillu.

Qallunaaq erinarsortartoq tusaamasaq peqataaniartoq

Kalaallit eqqumiitsuliortut peqataasussarpassuit saniatigut eqqumiitsuliortut nunanit avannarlernersuut aamma peqataassapput. Soorlu Pernille Rosendahl qallunaat nipilersoqatigiittarsimasut Swan Lee-kkut aamma The Storm-ikkut erinarsortorisimasaat.

Nuuk Nordisk Kulturfestivalimi ataqatigiissaarisoq, Jonas Nilsson, ilanngullugu ilisimatitsivoq aaqqissuisunut pingaaruteqarsimasoq Nuuk Nordisk Festivalip 2015-imi pilersinneqarneranut siunertaasup eqqarsaatigeqqinnissaa.

Pikialaartitsinermi 2015-imi siullermik ingerlanneqareersorlu eqqumiitsuliortut 2017-imi peqataasut amerleriarujussuarsimapput.

– Ukioq mannali Nuuk Nordisk Kulturfestival kingullermernit minnerussaaq. Tamanna pissuteqarpoq neriuutigineqarmat sumiiffimmi tusarnaariat annertunerusumik soqutiginnermik takutitsinissaat, tusagassiuutinut nalunaarummi ilaatigut taama tunngavilersuipput.

Pikialaartitsinissami pilersaarutit tamakkiisut nittartakkami uani takuneqarsinnaapput www.nuuknordisk.gl