Nuummi aalisakkerivik nutaaq
Aalisakkanik suliffissuaq nutaaq pingasunngornermi atulissaaq. Tamatuma kingunerilissavaa, Nuummi aalisartut tunitsivinnik assigiingitsunik pingasunik tunitsivissalissagamik.
Polar Raajat A/S Polar Seafoodip suliffeqarfiutaanut ilaasoq nutaamik aalisakkanik Nuummi suliffissualiorpoq maannakkut Polar Raajat raajaleriffiata saniani.
Aalisakkanik suliffisuarmi tunisassiorneq aallartippat siullermik 25-nik sulisoqassaaq, aqutsisuniillu naatsorsuutigineqarpoq sulisut ikinnerpaamik marloriaataannik amerlanerusut sulisorineqalersinnaassasut, Polar Raajat tusagassiuutinut nalunaaruteqarlutik taama allapput.
Inuussutissarsiuteqarnermi atortut nutaaliarnerpaat aamma kivitsissutit usingiaanermi atortut nammineq pigisat atorlugit, ulloq unnuarlu tunisassiornerup ammasarnissaa naatsorsuutigineqarpoq.
- Ataatsimut isigalugu naatsorsuutigaarput, Nuummi tunisassiorfittaaq aalisarnermik inuussutissarsiornermut pisariaqartinneqaqisumik eqeersaataassasoq. Nuummiinnaanngitsoq, Nunattali qeqqani tamarmi, Polar Raajat pisortaat Jan Weinreich oqarpoq.
Naalakkersuisut siulittaasuata Kim Kielsenip aalisakkanik tunisassorfik nutaaq pisortatigoortumik ammaanersiussavaa, tamannalu pissaaq pingasunngornermi novemberip ulluisa 15-anni ualikkut pingasunut.
Piumasut tamarmik Kalaallit Nunaanni aalisakkeriviit nutaaliaanersaannik takusaanissaminnut tikilluaqquneqarput Polar Raajat tusagassiuutinut nalunaaruteqarlutik taamma allapput.
