Nuuk Central Parkeqassava?
Inuusuttut Timi Asimip suliniutaani peqataasut ukiuni 43-ni Blok P'p inissisimaffiata sumut atorneqarnissaa pillugu siunnersuusiortinneqarput. Inuusuttut oqariartuutaat paatsuugassaanngilaq.
- Inuusuttut arlaannaataluunniit inissialiornissaq tikkuanngilaq. Sammisassaqartitsivimmik sanasoqarnissaa piumaneruaat, Kim Godtfredsen suliniummik Timi Asimimik ingerlatsoq oqarpoq. Taakku anguniarpaat inuusuttut inooqataanermut piginnaanngorsarnissaat.
Inuusuttut 20-it missaanniittut Timi Asimimi peqataasut oktoberip aallartilaarnerani isumasioqatigiisinneqarput tassanilu illoqarfiup qeqqata atorneqarnissaa pillugu siunnersuusiortinneqarput.
- Nuummi annertoorujussuarmik aserorterisoqartarpoq. Aserorterisarneq annikillisarneqarsinnaavoq inuusuttut suleqatigalugit inuusuttut pisariaqartitaat aallaavigalugit aaqqiissutissanik nassaartoqartuuppat, Kim Godtfredsen oqarpoq.
Inuusuttut siunnersuutigaat sammisaqartitsivimmi cykkilertarfiliortoqarsinnaavoq aammalu timersornissamut periarfissanik nutaani pilersitsisoqarsinnaasoq. Ilanngullugu siunnersuutigaat inuusuttut ornittagaannik ungdomsklubbimik cafémilluunniit pilersitsisoqarsinnaasoq.
Inuusuttut siunnersuutaat maanna illoqarfiup pilersaarusiorneranut Kommuneqarfik Sermersuup immikkoortoqarfianut tunniunneqareerput. Siunnersuutinik tigussaasunik sanasoqareerpat politikkikkut isummerfigisassanngorlugit ingerlateqqinneqassapput.
Nuummi illoqarfiup qeqqa Tuujuk aamma Blok P'p inissisimaffigisimasaa pillugu tamakkiisumik pilersaarut ilusilersorneqaleruttorpoq. Tuujummi ilaqutariinnut inissiat sananeqassapput.
- Tassani illorsuarnik portusuunik sanasoqassanngilaq. Illut pukkitsut akulikittulli Tuujummi sananeqassapput, Kommuneqarfik Sermersuumi illoqarfimmut pilersaarusiortoq Bilo Stigsen Høegh KNR-mut oqarpoq.
Illoqarfiup qeqqani tamakkiisumik pilersaarummi Blok P'p inigisimasaa aamma ilannguneqassaaq. Taamaammat maanna aaqqiissutaagallartussamik aalajangertoqassaaq.
Timi Asimikkut isumaat Kommuneqarfik Sermersuumut anngunneqareerpoq. Pilersaarutit malillugit atuarfiit ilaat aamma NUIF ilanngullugit tusarniaavigineqassapput.
Illoqarfiup qeqqanut pilersaarut kommunalbestyrelsep 2013-mi oqaluusereqqissavaa.
