Nuuk anginermik umiarsualivittaassaaq

Nuup nutaamik umiarsualivittaarnissaa piviusunngortussanngorpoq. Tassami Kommuneqarfik Sermersuumi kommunalbestyrelsep 40 millionit koruuninik aningaasaliinissaq akuersissutigaa. Pilersaarutit naapertorlugit umiarsualivissaq 2014-imi naammassissaaq.
Allattoq Elisa Isaksen
novembarip 24-at 2011 08:16

Kommuneqarfik Sermersuumit tusagassiuutinut nalunaarummi oqaatigineqarpoq, suliffeqarfimmik Namminersorlutik Oqartussat, Kommuneqarfik Sermersooq, Royal Arctic Line aamma Aalborg Havn piginnittoralugit pilersitsisoqarnissaa isumaqatigiissutigineqartoq.

- Suliffeqarfimmik umiarsualiviliornermik aamma umiarsualivimmik ingerlatsisussamik pilersitsineq Nunatsinni nutaajulluinnarpoq. Umiarsualivimmik niuerneq tunngavigalugu  suliffiusumik namminerlu aningaasatigut imminut akilersinnaasumik ingerlatsinissaq sungiunniartussaavarput, Kommuneqarfik Sermersuumi borgmesteri Asii Chemnitz Narup oqarpoq.

Nuummi umiarsualivik mikivallaartoq kommunalbestyrelsimi isumaqatigiissutigineqarpoq, uninngatitsivissaq annikippallaartoq, tamannalu pissutigalugu Nunatta Kitaani tamarmi nassiussanik assartuinermi akimmisaarutaajuartartoq.

Nuummi containerersorluni umiarsualivimmik nutaamik anginerusumillu piaarnerpaamik umiarsualiviliortoqarnissaa, Assartuussineq pillugu Isumalioqatigiissitap 2011-mi upernakkut inassutigaa. Tamannalu piginnittunngortussat maanna piviusunngortinnialerpaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq