Nutsat Qeqertasussummi nassaat nunarsuarmi tupaallatsitsipput
Nujamineq nassaarineqartoq aallavigalugu paasineqarpoq, angut inuusuttoq, itsarnisarsiuunit Inummik taagorneqartoq, ukioqqortunani toqusimasoq, nujarluttuulluni, panertunik mineqartoq, isai kajortunik qalipaateqartut taamatullu amia kajortumik qalipaateqartoq kiisalu kigutaasa siuaavi qanoq iluseqarsimanersut paasineqarsinnaalerlutik.
Angutip taassuma siuaasai ukiorpassuit issittumi najugarsimanngikkaluartut, issittumi inuusinnaanissaminut naleqqussarsimasoq, ilisimatuut nunanit allaneersut danskillu paasivaat.
Inuup sananeqaataanut ilisarnaatitut takussutissaq DNA, inuup suli inuunerani ukiut 15-it matuma siornatigut pissarsiarineqartarpoq. Uanilu ilisimatuut ukiut 4000-it matuma siornatigut inuusimasup sananeqataanut ilisarnaatitut takussutissamik DNA-imit pisunik paasissutissanik pissarsisinnaalernerat oqaluttuarisaanermi aatsaat iluatsippoq, ilisimatooq aamma inuup sananeqaataanut ilisarnaatinik takussutissanik ilisimatusartoq Eske Willerslev oqarpoq.
Nujamineq Qasigiannguit eqqaanni Qeqertasussummi 1980-ikkut ingerlaneranni nassaarineqarpoq, kingornalu Danmarkimi katersugaasivissuarmi Nationalmuseumimiitinneqarluni.
Inuup sananeqaataanut ilisarnaatitut takussutissaq DNA, ukiut 4000-it matuma siornatigut pisumit paasissutissanik pissarsiniarnermi iluatsippoq, atortoq enzym aalajangersimasoq atorlugu iluatsimmat. Sananeqaatinut ilisarnaatit piffissap sivikitsup ingerlanerani ajoqusertarsimapput.
Nappaatit aalajangersimasut kinguaariit qallunaat kalaallillu akornanni kingornunneqartarput, Eske Willerslev oqarpoq, maannakkut paasisat kingulliit aallaavigalugit, kingumut qiviarluni paasineqarsinnaalerput, ukiut aalajangersimasut ingerlanneranni nappaatit aalajangersimasut nappaatigineqartarnerat paasineqarsinnaalerput, sunillu aallaaveqartarnersut paasineqarsinnaalerlutik, Eske Willerslev oqarpoq.
Eske Willerslev, Københavnip universitiani professoriuvoq. Nutsap ukiunik 4000-inik pisoqaassusillip sanaaneqaataanik paasisat aallaavigalugit allaaserisaq, atuagassiami nunarsuarmi tamarmi tusaamaneqartumi Naturemi aqagu saqqummertussami ilanngunneqassaaq.
