Nutaarsiassat aliannaarnartullu nuannersumik ataatsimoortillugit
Pingaartumillu Tim Christensen qangarnisanik 90-ikkunneersunik, Tim Christensenip Dizzy Mizz Lizzymikkallarami appimmat, Katuami aliannaartut rockertullu pikkusoriilipput.
Tamanna sioqqullugu Rikka taavalu Sussat arfininngornermi tusarnaartitsinermi tusarnaariat inuusunnerusunut nuannarilluagaannik appisimaarput.
Sussat appisimaareermata nipilersoqatigiit rockertartut Nanook appimmata, festivalertoqarnera tusarnaariat taarsiipput. Tusarnaariat inuusuttuarartaat inersimanersunut rockimillu soqutiginninnerusunut akulerutiinnanngikkunik ikinnerulerput, erinarsuutillu Seqinitta qinngorpaatit aammalu AI AI pikkusuutigineqarlutik.
Tamatuma kingorna Katuami nipilersortarfimmi nipilersortarfiullu saavani tusarnaariat taarseeqqittoqarpoq. Unnuap qeqqata qaangilaaraa nipilersoqatigiit Arctic Spirits appimmata nujakkaat heavy metalimillu nuannarisallit headbangernissaminnut periarfissaqalerput.
Metalimillu nuannarisaqarpallaanngitsut tunuarterput unnummilu tassani festivalertoqarneranilu appittussat pingaarnerit appinnissaannut anersaartorfissaqalaarlutik.
Tim Christensen & The Damn Crystals appikkamik siullerpaamik tusarnaarianut kalaallinut appisimaarput. Appisimaarnertillu tikilluaqqusaalluarnertut eqqaamassajunnarsivaat.
Immaqa tupaallaatigineqarpallaanngitsumik Tim Christensenip Dizzy Mizz Lizzymiikkallarami atortagai qanganisaanerusut Katuami pikkusuutigineqavissorput.
Nipilersoqatigiit appitaasa nuannarineqarpaartaat, atukkamik aappassaat appikkamikku ima nuannisartitsigaaq allaat tusarnaartitsiviup saavani uivertoqangajalluni.
Tim Christensen & The Damn Crystals naggasiutigalugu Dizzykkut atugaat 11:07 PM atorpaat aammalu Paul McCartneymut nersorinnillutik Live and Let Die atorlugu.
Tim Christensen unnuaq tusarnaarsimanngikkukku unnugu periarfissaqarputit, Hans Lyngemmi inersuani Hans Mortensen peqatigalugu eqqissimanerusumik appisimaartussaavoq.
