Nutaarmiormiu angerlaqqajaavoq

- Rigshospitalimit ulloqeqqata-tungaa nalunaarfigineqarpunga, angut 32-inik ukiulik  ippassaanikkunni minnerusumik pilatsilluni suliarineqarsimasoq. Pilatsinneralu pitsaasumik pilersaarutit malilluinnarlugit ingerlasimavoq. Eqqumavoq, naatsorsuutigineqarporlu Nunatsinnut uteriaannanngulersoq. Nunutsinni nakorsat  pisortaat Carsten Thordahl, taama oqarpoq.

Angulli 81-inik ukiulik, suli anersaartuuserlugu sinitsinneqarpoq.

- Ullut arlallit anersaartuuserlugu sinitsinneqarallassaaq, kisianni ulorianartorsiunngilaq, Carsten Thordahl oqarpoq.

Dronning Ingridep Napparsimavissuani nakorsat pisortaat, Carsten Thordahl, eqqissisaavoq pilatsereernerata kingorna anersaartuuserlugu sinitsinneqarnera nalingiinnaalluinnartoq. Sinitsinneqarninilu peqqissaatigissagaa.  

Sulilu saassunneqarnermi kingorna itersimanngilaq.

- Suliarineqarneranut pilersaarutinut ilaavoq, taamatut anersaartuuserlugu sinitsinneqassaaq, Carsten Thordahl taama oqarpoq.

Taakku angutit marluk tamarmik niaqqumikkut pilatsillutik suliarineqarput.

Politimestereqarfimmi allaffissornermi pisortaq, Claus Risbjergip, ilisimatitsissutigaa toqutsisutut pasisaq Nuummut tikissimasoq.

- Tikippoq, maanilu Nuummi pinerlussimasunut inissiisarfimmut inissinneqarpoq, Claus Risbjerg taama oqarpoq.

Tamatuma saniatigut tunngaviusumik inatsit naapertorlugu killisiuinerup matoqqasussanngortinneqarsimanerata Nunatta Eqqartuusivianik isummerfigineqarnissaa politiinit utaqqineqarpoq.

Taavalu suliassat tamarmik suuneri qissimigaangassanngussapput:

- Teknikerit pinerluffimmi misissuinerminnit nalunaarusiasatik allassavaat. Assinik ersersagassaqarpoq. Toqusullu misissorneqarnerat ullumi naammassineqassangatinneqarpoq. Politimestereqarfimmi allaffissornermi pisortaq, Claus Risbjeg taama ilisimatitsivoq.

Nunatta Eqqartuussisuata Søren Søndergård Hansenip naatsorsuutigaa, suliaq matoqqasumik ingerlatiinnarneqassanersoq aqagu aalajangiiffigissallugu.

Tassalu unnerluussisut piumasaqaataat Nunatta Eqqartuussisuata atortussanngortippagu, pasineqartup tunngaviusumik inatsit naapertorlugu killisiuinermi nassuiaataani immikkuualuttut politiit saqqummiutissagaat naatsorsuutigineqarpoq.