Nusukap siulittaasua: Aalisariutaatillit mikinerit aavaleraasartuunik aalisarnissaminnut ajornartorsiulissapput

Nunatta Karsia aalisarnermut akitsuutinit isertitaqarluartarpoq.

Naalakkersuisut avaleraasartuunik misileraalluni aalisarnikkut akitsuusersuinikkut aningaasanik 90 millionit koruuninik isertitsinissaq ukioq manna anguniarpaat.

Tamanna ajornartorsiutaasoq soqutigisaqaqatigiit marluk isumaqarput.

Aningaasat taakku isertinnissaat qulakkeerumallugu avaleraartuunnik misileraalluni 5.000 tonsinik aalisarniaraanni 7,5 millionit koruuninik qularnaveequteqarnissaq piumasaqaataavoq.

Akileraarutinut akiliisinnaaneq uppernarsarniarlugu tamanna Naalakkersuisut piumasaqaatigaat.

Taamaaliornissarli aalisariutaatilinnut mikinerusunut aallartisalerniarsunut ajornartorsiutaasinnaasoq, Nunaqavissut Suliffiutillit Kattuffianni Nusukami siulittaasoq Gerth B. Lynge isumaqarpoq.

-Nusukamiit isumaqarpugut nutaanik aalisartunik aallartisaaniarnitsinnut akornutaasoq. Tassami pimoorussillutik  ilumoorussillutillu qinnuteqartut akiliissaqqaarput pisassanik tunineqarnertik aallaavigalugu. Taamaattumik taanna uniffittut isigineqassanngippat Nusukamiit siunnersuutigivarput aningaaserivimmiit aningaasanik qularnaveequseeqqaartarnissaq peerneqassasoq, Nusukami siulittaasoq Gerth B. Lynge oqarpoq.

Taanna isumaqarpoq aalisariutaatillit akiliisinnaanertik uppernarsaqqaartariaqanngikkaat.

Nusukami Halibut Greenland aamma Arsuk Fish ilaasortaapput.

Kalaallit Nunaanni piniartut aalisartullu kattuffiata aamma akitsuusersuinissamut siunnersuut malillugu aningaaserivimmi aningaasanik qularnaveequseqqaartarnissaq isumaqataaffiginngilaat.

-KNAPK-miit isumaqarpugut piumasaatitut siunnersuut eqqartorluarneqaqqaartariaqartoq. Tamanna tupaallaatigaarput. Aningaasanik annertuunik qularnaveequsiinissaq aalisarusuttunut aporfiusinnaavoq, KNAPK-mi pisortap tullia, Tønnes Berthelsen oqarpoq.

Taassumali aamma eqqaamaqquaa avaleraasartuunnik aalisarusuttunik aningaaserivimmiit aningaasanik qularnaveequusisinnaasunik  peqarmat.

Naalakkersuisut avaleraasartuunnut misileraaluni aalisarnissamut siunnersuutaat Inatsisartut ippassaq oqaluuseraat.

Avaleraasartuunnut akileraarut kiilumut 1,50 koruuniussasoq siunnersuutigaat.