NUSUKA-p ingerlaannarnissaa pisortaasimasup qularaa
Suliffiutillit amerlarnerpaagamik 100-t missaanniissimasut soraarnermi nalaani 20-nnanngorsimanerat kattunnissamut siunnersuumminut tunngavilersuutigaa. Ole Aggo Markussen ima oqarpoq:
- Uani aasap ingerlanerani ilaasortat ikilerujussuarnerannik kinguneqarpoq, taavalu uanga naliliisinnaanera naapertorlugu isumaqarsimanngilanga kattuffik akisussaaffeqartumik minnerunngitsumillu suliffeqarfinnut akisussaaffeqartumik tutsuiginartumillu siunissami sullissisinnaasoq, oqarpoq.
Ole Aggo Markussenip soraarnerminut tunngavini taama oqaatigaa. Pisortaasimasup aamma oqaatigaa ukiup matuma ingerlanerani NUSUKA-mi ilaasortat misissuataareerlugit akiliisanngitsut ilaasortaajunnaarsinneqartariaqarmata ilaasortat 100-t missaaniikkaluartut 20-nnanngortariaqarsimasut. Ilaasortat sinneruttut aallaavigalugit NUSUKA-p GA-llu kattunneqarnissaat siulersuisunut siunnersuutigigaluarpaa, tamannali isumaqatigineqanngilaq.
Ole Aggo Markussen isumaqarpoq sulisitsisut ataasiinnarmik kattuffeqartariaqartut.
- Uanga nalilerpara Nunatsinni kattuffinnut marlunnut inissaqartitsisoqanngitsoq. Siulersuisunut minnerunngitsumillu siulittaasunnut siunnersuutigisarsimavara eqqarsaatigeqqullugu GA-mut kattussinnaanissaq aamma isertuuttarsimanngilara GA-p pisortaalu oqaloqatigiittaratta pisortatiguunngikkaluartumik. Isumaga naapertorlugu siunissaqarnerpaassaaq sulisitsisut kattuffii siunissami ataasinngorutta, nangippoq.
Sulisitsisut nunaqavissut NUSUKA-p sullisissallugit nukissaqarfigisimanngikkai pisortaasimasup aamma nassuerutigaa.
- Sullissinissamut annertoorujussuarmik NUSUKA-mi nukissaqartoqarsimanngilaq, taanna nassuerutigisariaqarpoq. Aamma kattuffiup qanoq aaqqissuussaaniinneruvoq. Siunissami kattuffik ataasiinnanngorpat qularinngilara suliffeqarfiit minnerumaat immikkut sullinneqarsinnaanerannik aaqqissuisoqarsinnaasoq, oqarpoq.
Naammaginartumik sullissisinnaannginnerup saniatigut NUSUKA sulisitsisunik pikkorissaanissaminut nukissaqarsimanngitsoq, Ole Aggo Markussen oqarpoq.
- Ineriartortitsinissamut periarfissaqassagaanni, aammalu ilaasortat periarfissaqartinneqassappata, assersuutigalugu aningaasarsiornikkut suliffeqarfiup qanoq pitsaanerpaamik ingerlanneqarsinnaaneranut rutinet, aningaasanik aqutsinerit allallu pikkorsissaassutigineqassappata soorunami aningaasarparujussuarnik naleqartussaapput. Taanna ulloq manna tikillugu pisimanngilaq, NUSUKA-mi pisortaasimasoq Ole Aggo Markussen oqarpoq.
Aamma erseqqissaatigaa NUSUKA-mit, juulip aallaqqaataani 2006-imi suliffigilersimasaminit, soraarsitaanani, namminerli suliunnaarnissani kissaatigisimallugu.
