Nunavut Tunngavik Inc. Qaanaalialersoq
Kattuffik Nunavut Tunngavik Inc, Nunavummi nunamik oqartussaanermik isumaqatigiissutinik aqutsisoq, Qaanaamut marsip naanerani apriililluunniit aallartinnerani tikeraarnissamik maanna pilersaarusiorpoq.
Taama Nunavut Tunngavimmi siulersuisuni siulittaasoq, James Arreak, Ottavami marlunngormat ataatsimiinnermi KNR-imut oqarpoq.
Nunavummi Inuit Davis Strædip illuatungaaniittunik ataatsimoorfippassuaqarnerat, James Arreap, KNR-imut oqaatigaa.
Tikeraarnissami imaani uumasunut miluumasunut tunngatillugu, pinngortitami pisuussutinik aqutsinerup oqallisigineqarnissaa siunertaavoq.
Nunavullu kangiata tungaaniittunut kiisalu sinerissap qanittuani Inunnut pingaarutillit allat tassaapput uuliasiortitseqatigiiffissuit imaani sajuppillatsitsillutik misissuineri, amerlanertigut imaani uumasunut miluumasunut pitsaanngitsumik kinguneqarsinnaanerat pillugu Inunnit akerlerineqartut.
Taamattaarlu naggueqatigiinnik Qaanameersunik ataatsimoorluni kulturikkut aaqqissuussisinnaanerit, Nunavut Tunngavimmit oqaloqatigiissutigerusunneqarput.
Nunavut Tunngavimmittaaq innuttaasut akornanni ilaqutariissutsikkut attaveqaatit sukumiinerusumik misissuiffigineqarusupput. James Arreallu assersuutitut Inuit Canadami Aajuitsumeesut Inunnik Qaanaameersunik ilaqutaqarnerat taavaa.
Nunavut Tunngavimmilu ilaasortat saniatigut sumiffimmi piniartut kiisalu nunap immikkortuani kattuffimmi sinniisut aamma angalaqataassapput.
Ullut angalavissat suli erseqqissumik aalajangerneqanngitsut, James Arreak KNR-imut oqarpoq.
