Nunavummiut amerlasuut perlernaviiginnarlutik nerisarput
Akilinermi Nunavummi naggueqatigiit Inuit inuussutissaqarniarnerat ima ilungersunartigaaq, allaat Inuit Tapiriit Kanatamimi siulittaasup, Terry Audlap, tamanna nunanut ineriartortunut assersuullugu. Ilaqutariippassuit, ilaquttaminnit Canadap kujasinnerusuanut nuussimasunit nerisassanik nassinneqartarallartillutik uumaannarsinnaasarput.
Nunavummi ilaqutariit ataatsit ukiumut 21.000 dollarsit missaannik isertitaqartarput, tassa 110.000 koruunit missaanniittunik, ilaqutariinnulli nerisassat ukiumut 105.000 koruunit missaannik akeqarlutik. Taamaalilluni ilaqutariit ataatsit ukiup ataatsip ingerlanerani taamaallaat 5.000 koruunit atisanut, ineqarnermut, angallannermut, atuakkanut assigisaannullu atorsinnaavaat
Terry Audlap Ottawami ataatsimiinnermi erseqqissarpaa, pissaqarluartut pissakinnerusullu assigiinngissusiat alliartuinnartoq.
- Inuiaqatigiinni naligiinneq atugarigaluaratsigu, tassa pisuut piitsullu assigiinngissuteqarpallaaratik. Nunavummi suleqatigeeqqilertariaqarpugut, kukkunivut ilinniarfigalugit ingerlaqqinniassagatta, Terry Audla oqarpoq.