Nunavummit politikeri isornartorsiuisoq: Tusaavarsinga iliuuseqanngilasili

Nunavummit Canadap inatsisartuinut ilaasortaq Mumilaaq Qaqqaq qinigassanngorteqqinniarnani aalajangerpoq.

Inatsisartunilu kingullermik sapaatit akunnerata siuliani oqalugiarami sakkortuumik isornartorsiuivoq.

- Maani inatsisartuni isumannaatsumiillunga misigisimanngilanga.

- Isumannaallisaasut malittarpaannga allatullu isikkoqarama unitsinniartarlunga. Tamaani tikilluaqqusaanngilanga, Qaqqaq kingullermik oqalugiarnermini oqarpoq.

Naammattumik iliuuseqartoqarsorinngikkaa

27-nik ukiulik Mumilaaq Qaqqaq New Democratic Partymut ilaasortaalluni Canadap inatsisartuinut 2019-imi qinigaavoq.

Nunavut kisimiilluni sinnerlugu ilaasortaagami ingammik naggueqatigiit Inuit pisinnaatitaaffii pillugit suliaqarpoq.

- Naggueqatiit Inunneersugut sumi tamaani akornusersorneqartarpugut.

- Naalakkersuisut oqaatsinik kusanartumik atuipput, tamannali naammanngilaq. Meeqqat angerlarsimaffinni oqoqartuni napparsimalinnginnissaannut ilaqutarsianulluunniit inissinneqannginnissaannut iliuuseqarnissaat atorfissaqartipparput. Arnat inuusuttut arnallu periarfeerunneqartarput.

- Qanoq oqarnersunga tusaavarsi, kisianni iliuuseqanngilasi, Mumilaaq Qaqqap inatsisartunut oqalugiarnini naggaserpaa.

Canadami inatsisartunut qinersinissap tullia ukiaru nalunaarutigineqarnissaa naatsoruutigineqarpoq.