Nunavummi uranisiortoqalernissaa nalorninarallarpoq

Nunavummi nunamik piginnittussaatitaanermik kattuffiup Nunavut Tunngaviup, uranimut akerlioreersut maanna suleqatigilerpaat uranimik akerliusut kattuffiat. Taamaassilluni uraninik qalluisoqarsinnaanissaa pillugu oqallinneq sukariaannarpoq.

Kattuffik Nunavut Tunngavik, siornatigut uranisiorsinnaaneq tapersersugarisimavaat. Maannali kattuffiup nutaamik siulittaasoqalerneratigut, kattuffiup tapersersugarisimasartik allanngortittussanngorpaat.

Nunaqarfiup Baker Lake-ip kalaallisut Qamanersuarmik taaneqartartup eqqannguani, maanna kuultisiorfeqarpoq, Meadowbank. Maannalu suliffeqarfissuit arlaqartut pilersaaruteqarput, aatsitassarsiorfinnik allanik, tassalu uranisiorfinnik pilersitsissallutik, taakku ilagaat ingerlatseqatigiiffissuaq atsersimasaq Kiggavik.

Qamanersuup eqqaani ukiut 20-t matuma siorna  uranisiortoqarnialermat, innuttaasut annertuumik akerliusimapput pissutigalugu sumiiffik taanna tuttoqarfissuummat. Maannalu kinguaariit nikinneranni, innuttaasut amerlanerusut aatsitassarsiorsinnaanermik ornigisaqalersimapput.

Nunavik Tunngavimmiit oqaatigineqareerpoq, upernaap ingerlaneranni politikkissartik saqqummiunniarlugu. Politikkissaat qanorpiaq isikkoqassanersoq, suli nalunarallarpoq.

Nunavimmi poliitikerit maajip 15-niata tungaanut, nunaqarfinni inuinnarnik tusarniaasaqattaarput, inuinnaat aatitassarsiorfiliortoqarnissaanut qanoq isumaqarnerat tusarniarlugu. Poliitikeriniit ukiaru aalajangiiffigineqarumaarpoq, uranisiorfinnik ilumut ammaasoqarumaarnersoq.