Nunavummi nannut kisinneqartussanngorput
Paasissutissanik piviusunik pissarsiniarluni naatsorsuineq ingerlanneqassasoq. Maannami piniartut nannut amerlisimanerartarpaat illuatungaani uumassusilerituut nannut ikiligaluttuinnarneraraat. Canadami nutaarsiassaqartitsivik CBC News taama allappoq.
Nannunillu naatsorsuisoqarnialerpoq, tamannalu ajornakusuussasoq takorloornarpoq. Hudsonip tasiusarsuata kitaani silaannarmiit nannut kisinneqarniarput, CBC Newsilu naapertorlugu Qeqertaaluup kangerliumarngani nannut qanoq naatsorsorneqassanersut suli aalajangerneqanngilaq. Naatsorsuinermili aasaru ingerlanneqartussami periusissat nunatsinnit misilittarneqartareersut atorneqassasut nutaarsiassaqartitsiviup eqqaavaa.
- Naatsorfuineq ataatsimoorussamik ingerlanneqassaaq, kalaallit nannunik immikkut ilisimasalittaat naatsorsuinermut peqataassapput, Nunavummi avatangiisinut ministeri Daniel Shewchuk CBC Newsimut taama oqarpoq.
Nunavummi pisup saniatigut USA aamma erseqqissaavoq nannut Alaskami uumaffigisaasa illersorneqarnissaat eqqumaffigigitsik.
- Nannut uumaannarnissaat anguniarlugu annertuumik siunissamullu atasussamik iliuuseqarniarluta sulinerput ingerlatissavarput, aalisarnermut, uumasunut nunanullu eqqissisimatitanut viceministeri nutaarsiassaqartitsivimmut AP-mut taama oqarpoq.
