Nunavumi nannuttassiissutit ikiliniarneqarput
Nunani tamalaaniit pillaatissiissutit pinngitsoorniarlugit Nunavumilu aningaasarsiorneq innarlerumagu nannuttassiissutit isumaqatiginniutigineqassasut, Nunavut-mi naalakkersuisut isumaqarput.
Nunavut-mi piniagassani nakkutiginninnermi ataatsimiititaliaq, the Nunavut Wildlife Management Board-mik taaguuteqartoq nannuttassiissutit pillugit Iqalunni uani sapaatip akunnerani ataatsimiilerput.
Nunavumi avatangiisinut ministeri Daniel Shewchuk ataatsimiititaliamut oqarpoq, Nannut illersugaanerat kisimi pineqanngitsoq aammali USA-p EU-llu nannunik eqqusseqquseqqusiunnaalernerat aningaasarsiornikkut innarliisinnaasoq.
Nunaqarfinni aningaasarsiorneq eqqorneqariaannaavoq nannunniat Nunavumukarsinnaajunnaarpata, Avatangiisinut ministeri oqarpoq.
Nannut qanoq amerlatiginersut nungutaanissamullu uloriarnartorsiornersut pillugit assigiinngitsunik ataatsimiinnermi isummersortoqarpoq taamaattoq Nunavumi naalakkersuisut nannuttassiissutit ukiumut 105-iusaraluartut 64-inut ikilisikkumavaat.
Nannut ukiut qulit matuma siorna kisinneqarmata nannut 2.100-simanissaat ilisimagineqarpoq, piniartulli arlallit ataatsimiititaliamut oqariartuutigaat kisitsinermi kingullermi amerlassusiliisimianerit pisoqalisimallutillu biologit sumiiffinni kukkusumik kisitsillutillu kisitsinermi piffissaliunneqartoq kukkunerusoq.
Piniartuttaaq isumaqarput nannut amerlanerujussuullutillu nutaamik pitsaanerusumillu kisitseqqittoqassasoq nannuttassiissutinik allannguinnginnermi.