Nunavimmi peqqinnissakkut isumaginninnikkullu ajornartorsiutinut aaqqiissutissat nutaat

Nunavimmi isumaginninnikkut peqqissutsikkullu ajornartorsiuteqartorpassuit ikiorserniarlugit nunaqarfinni ilaqutariinnut angerlarsimaffiliornissaq isumassarsiat saqqummiunneqartut nutaat ilagaat. Nunap immikkoortuani Quebecimi ministerit pingasut Nunavimmut tikeraaqqammerput. Tassalu nunap avannarpasinnerusortaanut ministeri, isumaginninnermut ministeri peqqissutsimullu ministeri. Pissutsit qanimut takujumallugit Kuujjuaq Povunitorlu apriilip aallartinnerani sapaatit akunneranni siullermi tikeraarpaat.
Allattoq Marianne Stenbæk, Iqaluit, Nunavut., Simon Uldum
apriilip 10-at 2013 07:27

Minnie Grey Kuujjuarmeersoq Nunavimmi peqqissutsimut isumaginninnermullu pisortaqarfimmi januaarip qaammataani pisortaanertut toqqarneqarpoq.

Minnie Grey KNR-imut oqaluttuarpoq ministerit pingasut ataatsikkut tikeraarneri takornartaasoq, taakkulu takusatik alutorsaatigilluarsimavaat, aammali pitsanngorsagassat amerlaneri nammineerlutik takullugit.

Minnie Greyip nunaqarfimmi ilaqutariinnut angerlarsimaffiliornissamik isumassarsiaq saqqummiussimavaa. Taanna KNR-imut oqaluttuarpoq meeqqat angerlarsimaffinnit imigassamik, aningaasatigut persuttaanermilluunniit ajornartorsiuteqartunit nuutsiinnarnagit nunaqarfinni ilaqutariinnut angerlarsimaffiliortoqartariaqartoq, taakkunanilu ilaqutariit tamarmiutillugit katsorsarneqarlutik, taamaaliornikkut ilaqutariit avissaartuutinnginnerunissaat taamatullu aamma ajornartorsiutaareersut amerlinnginnissaat anguneqaqqullugu.

Ilaqutariit ilaqutarinnut angerlarsimaffimmut nuutsinneqartarnissaat siunertaanngilaq, tassanili ataatsimoortillugit katsorsarneqartarnissaat pineqarluni.

-Taamatut ilaqutariinnut angerlarsimaffiliornikkut utoqqaat ilisimasaat ilequtoqqanillu ilisimasaat atorluarneqarsinnaapput, Minnie Grey naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq