Nunavimmi issittumi qimuttuitsoqalernissaa siunnersuutigineqarpoq
Qimuttuitsut taaguuteqassapput Trans-Quebec, Quebecillu avannaata kujataatalu akornanni attaveqaataassallutik.
Ruslandip tusaamasaassutaasa ilagaat qimuttuitsut Sibiriakkoortartut, taakkumi Sibiria illuatungaanniit illuatungaanut sapaatip akunnerata missaani ingerlaarfigisarpaat. Maanna taakkununnga assingusumik Nunavimmi qimuttuitsunut aqqusiortoqarnialerpoq. Nunavimmi qimuttuitsunut aqqusiortoqarnissaanik siunnersuut Quebecimi inatsisartunut ippassaq saqqummiunneqartoq, Canadamiut aviisianni Gazette-imi allaaserineqarpoq.
Siunnersuummi atsiornernik katersinikkut tapersersorneqarluartukkut siunnersuutigineqarpoq, qimuttuitsut avannamukarnerminni Ungavap kangerliumarngata sineriaa atuarlugu ingerlaartassasut, Nunaviullu avannarpiaa aqqutigeriarlugu, tasiusarsuup Hudson Bayip sineriaatigut kujammukartassallutik, tassa Kuujjuarmiit Kuujjuaraapimmut ingerlaartassallutik. Qimuttuitsut aqqutiminni nunaqarfiit aqqusaakkatik, nunallu immikkoortuini illoqannginnersat takorianut piukkunnartut uniffigisassavaat, soorluttaaq illoqarfiit Quebecip kujasinnerusuaniittut uniffigineqartassasut.
Dennis Trottier, Quebecimi inatsisartunut siunnersuummik saqqummiussisoq isumaqarpoq, qimuttuitsut aningaasarsiornikkut nutaamik suliffissaqartitsiniarnikkullu periarfissiiumaartut, takornariarumasorpassuarnit ilaaffigineqartassallutik kiisalu Quebecip avannaata kujataatalu akornanni attaveqaataassallutik.
Qimuttuitsut piviusunngortinneqassagunik Trans-Quebecimik taaguuteqartussat ilaaffigalugit, sapaatip-akunnerata ingerlanerani Quebeci tamakkerlugu angalaarfigineqarsinnaassaaq.
