Nunavimmi inissaaleqineq ingasalluinnartoq

Inissaaleqineq naggueqatigiit Inuit Canadami suliniaqatigiiffiannit, Inuit Tapiriit Kanatamit, naggueqatittalu nunap ilaanni suliniaqatigiiffiinit ukkatarineqaleriartorpoq.

Inuit issittumi, illumi ataatsimi najugaqartut  soorlu Canadami sumiiffinni allani, najugaqartunut allanut sanilliullugit arfinileriaammik amerlanerusut najugaqarput, TV-qarfiup  APTN TV-p misissuinerata nutaap tamanna takutippaa.
Misissuinermi paasineqartut ilagaat nunaqarfimmi ataatsimi illumi ataatsimi inunnut  sisamanut najugaqarfigineqartussatut sanaajusuni  inuit 20-t najugaqarsinnaasarput.

Tamatuma saniatigut illut maanna pioreersut affaat isugutattuusut APTN-imit oqaatigineqarpoq. Tassalu oqoqalersimallutik.  Aamma natit iikkallu putoqarajuttarput, taakkualu ilaanni teriarsoqarluni.

Illut pitsaasuunnginnerat pissutigalugu ilaatigut tuberkulosemik nappaateqartoqalerajuppoq, Nunavimmi,  Nunavummilu tuberkulosemik maannakkut nappaalasoqarpoq.  Tamanna aamma puallunnermik, isumatsassimangaarnermik imminullu toqunnermik kinguneqarsinnaavoq.

Taamaasillutillu Canadami naggueqatigiit Inuit Canadamiunut allanut naleqqiullugit ukiunik qulinik inuunikinnerusarput.

Canadami naalakkersuisut aningaasaleereerput, taakkuali naammanngimmata Inuit Tapiriit Kanatami naggueqatittalu suliniaqatigiiffii allat atugarisaat pitsaanerulersinniarlugit illuliornerunissamik piumasaqaateqarput.