Nunavimmi ilaqutariit illuannik ammaasut
Suliniut nutaaq, Ilaqutariit Illuat Qarmaapik, nunap immikkoortuani Kativimmi naalakkersuisut Nunavimmilu peqqinnissaqarfiup aningaasalersugaat, qaammatip matumani ingerlanerani ammarneqarpoq.
Ilaqutariit Illuat naggueqatitta inuusuttaannut samminerusoq nunaqarfiup innuttaanik assigiinngitsutigut kiffartuussiviullunilu allatigut ikiorsiisarfiuvoq.
Taanna Kangiqsualujjuarmi inissisimavoq, aamma George Riverimik taaguuteqartumi. Nunaqarfik 900-t missaannik innuttaqarpoq Nunaviullu avannaata kangisissortaaniilluni.
Qarmaapik meeqqat inuusuttullu ajornartoornerminni qimarnguivigisinnaavaat, tamatumalu saniatigut naggueqatitta inuusuttaasa ikiortariallit ikiorserneqarnissaat siunertaralugu angajoqqaanut ilaqutariinnullu siunnersuisarfiuvoq, aammalu inooqataaniarnikkut kulturikkullu sammisassaqartitsiviulluni.
Inuit periusitoqaat atorneqartut
Minnie Greyip, Nunavimmi peqqinnissaqarfimmi pisortaasup oqaatigaa nunaqarfimmiut ikiuulluarnerisigut ilaqutariit illuat piviusunngortinneqarsinnaasimasoq. Ilaqutariit illuat naggueqatigiit Inuit kulturertik aallaavigalugu periaasitoqaat atorlugit sumiiffimmi inooqataaniarnikkut ajornartorsiutinut aaqqiissutissanik neqerooruteqartuuvoq.
Ilaqutariit illuat ininik inuusuttut ilaqutaasalu ajornartoorfimminni najugaqarallarfigisinnaasaannik aamma pigisaqarpoq.
Peqqinnerulernissamullu neqeroorutit ilaattut, nerisassanik pitsaasunik peqqinnartunillu iganermik ilaqutariit illuanni aamma ilinniartitsisoqartarpoq.
Ilaqutariit illuinik naggueqatitta inuusuttaannik ikiorsiisarfiusunik Nunaviup nunaqarfiini allani pilersitsisoqarsinnaanera maanna neriuutigineqarpoq.