Nunatta oqaluttuassartaa alakkarlugu

Saqqummersitsineq Københavnimi Illu Atlantikumi tallimanngormat ammarneqarpoq.

- Saqqummersitsinissara qilanaarnaqaaq, titartakkammi uku "originalit" takutinnissaat qilanaarnaqimmat. Nuka Godtfredsen oqarpoq.

Titartarlugu oqaluttualiaq Danmarkimi katersugaasivissuup, Ilinniusiorfiup, Sermitsiap Nuka Godtfredsenillu suleqatiilluarnerisigut "Oqaluttuaq" pinngorsinnaasimavoq.

Ulloq manna tikillugu oqaluttualiap immikkoortui marluk saqqummersinneqareerput, taamaammat immikkoortuisa pingajussaata titartagartai takorusukkaanni saqqummersitsinermi alapernaaserneqarsinnaapput.

- Uannut pingaaruteqartupilussuuvoq kultooritta taamatut tegneserialiaralugu takutinnissaa. Uannut tunngatillugu oqaluttuarisaanitta toqqammavia soruqutigisorujussuuara, taamaammat uannut pingaaruteqartorujussuuvoq, Nuka Godtfredsen oqarpoq.

Oqaluttualiap immikkoortup ataatsip titartagartai Nuka Godtfredsenip ukiut marluk atorlugit titartartarpai, immikkoortullu pilersaarutit malillugit sisamaassapput, immikkoortulli tallimassaannut akissaqalernissi Nuka Godtfredsenip neriuutigaa.

Titartakkat qalipakkallu suliarinnginneranni Nuka Godtfredsenip suleqataasalu misissueqqissaarnerit ingerlateqqaartarpaat, titartakkammi piviusunit aallaaveqarnissaat pingaartinneqarpoq. Soorlu Nunatsinni najugaqarsimasut atortui, sakkui, piniariaasaat, inigisaat, atisaat, eqqarsartaasiallu tamarmik immikkoortinneqarnissaat pingaartinneqarluni.

Nukap titartagai qalipagaalu ilisimatuussusermik aallaaveqarluarsimangaarmata allaat oqaluttuarisaanermut pingaaruteqarsinnaasutut Danmarkimi katersugaasivissuarmit nalilerneqarput.

- Ulluinnarni takanani (Nationalmuseummimi) titartaasarfeqarpunga, takananilu qanganisarsiuut suleqatigivakka, aamma tamakkuninnga ilisimatuut suleqatigalugit. Taakkulumi ilisimasaat aallaavigalugit tegneserialiortarpunga, Nuka Godtfredsen oqarpoq.

- Taamaammat ulluinnarni suligaangama sunaluunniit apeqqutigisinnaasarpara, soorlu qanoq isikkoqarnissa qanorlu titartarneqarnissaa, ila sorpassuit apeqqutigisarpakka, tegneseriamilu qanoq isikkoqarnissaanut oqaloqatigiinnivut aallaaviusarlutik. Nuka Godtfredsen oqarpoq.