Nunatta nakorsaanera: Atuartut nunatsinnut angerlartut virusimik tunillatsissimanermut ersiuteqarnerlutik maluginiartariaqarpaat
Efterskoleni atuartut nunatsinneersut angerlarniassarileruttorput.
Danmarkimi atuarfiit tamarmik coronavirusip tunillaassornissaanut aarlerinninneq pissutigalugu matuneqarallarnerisa kingorna taamaattoqarpoq.
Ersiutit suuppat?
Coronavirusimik tunillatsissimasut ukuninnga ersiuteqarsimapput:
- Panertumik quersorneq
- Kissarneqarneq
- Anersaartorniarnikkut ajornartorsiuteqarneq
Nakorsaaneqarfiup nittartagaatigut annerusumik atuagaqarit
Nunatsinni tunillatsissimasumik suli paasisaqartoqanngilaq, efterskolenili atuartut virusi nunatsinnut nassarsinnaavaat.
Nunatta nakorsaanera Henrik L. Hansen tusagassiortunik arfininngornermi katersortitsinermi oqarpoq.
- Ilaatigut efterskoleni atuartut allanilu ilinniartut amerlasuut maanna nunatsinnut utertut pillugit ernumassuteqarpugut.
- Ilaat atuarfinni tunillaaffiusini atuartuusut nalunngilarput.
- Atuartullu taakkua virusimik maannga nassataqarsinnaanissaannut aarlerinaateqartoq nassuerutigisariaqarunarparput.
AAMMA ATUARUK Naalakkersuisoq: Efterskolertut Danmarkimiiginnartariarput - angerlarniarunilli akiliunneqarsinnaapput
Efterskolet sorliit tunillaaffiunersut nunatta nakorsaanerata annerusumik oqaaseqarfiginngilaa.
Atuartunulli inassuteqarpoq.
- Virusimik tunillatsissimanermut arlaannik ersiuteqarnerlutik maluginiassagaat pingaaruteqartupilussuuvoq, ersiuteqarunik allanit immikkoorsimasinnaaniassagamik peqqinnissaqarfimmullu oqarasuaatitigut saaffiginnissinnaaniassagamik, nunatta nakorsaanera oqarpoq.
Danmarkimit angalasut sissueqquneqartut
Danmark immikkut aarlerinartorsiorfiusutut nalilerneqanngilaq.
Taamaattoq Danmarkimit nunatsinnukartut tamarmik sissuernissaat nunatta nakorsaanerata inassutigaa.
Danmarkip killeqarfiata matunissaa danskit ministeriunerata, Mette Frederiksenip, tallimanngormat aalajangerpaa. Taamaalillunilu aamma nunatsinnut angalanissat matuneqarput.
Taamaalilluni killeqarfinni nunanit allaneersut nunatsinnukarfigisinnaasaanni nakkutilliisoqalissaaq.
Killeqarfiit matuneqarnerini Kalaallit Nunaat, Danmarki, Savalimmiullu akornanni timmisartuussinernut eqquinngilaq, nunaniilli allaneersut pingaarutilinnik suliaqartussatut akuerineqartut kisimik nunatsinnukarsinnaapput.
Arlallit misissugassat inernerinut utaqqisut
Inuit arfineq-pingasut coronavirusimik tunillatsissimanermut misissugassanik tigusiffigitissimasut misissuinerillu inernerinut utaqqisut, nunatta nakorsaanera Henrik L. Hansen tallimanngormat ualikkut oqarpoq.
Misissugassatut tigusat Københavnimut timmisartumik sapaatiuppat nassiunneqassapput, ataasinngorpallu ullaap-tungaani akissutersiffigineqarnissaat naatsorsuutigineqarpoq.
Maannamut misissuiffigitereertuni tunillatsissimasoqanngilaq. Tassalu virusimik tunillatsissimasunik suli paasinnittoqanngilaq.
