Naalakkersuisoq: Efterskolertut Danmarkimiiginnartariarput - angerlarniarunilli akiliunneqarsinnaapput
Danmarkimi efterskolertut nunatsinneersut sapaatit akunnerini marlunni tulliuttuni angajoqqaarsiaminniillutik ilaquttaminniillutilluunniit Danmarkimiiginnassapput. Danmarkimi atuarfiit tamarmik coronavirusimik aarleqquteqarneq pissutaalluni matuneqarallarnerat pissutaavoq.
Efterskolertut angajoqqaarsiaminiissinnaanngikkunik efterskoleminiiginnassapput, efterskoleminnilu inersimasunit isumassorneqassallutik.
AAMMA ATUARUK Naalakkersuisut kalaallinut atuartunut: Danmarkimiiginnaritsi
Ilinniartitaanermut naalakkersuisoq, Ane Lone Bagger (S) tusagassiortunik katersortitsinermi najuutinngitsoq nalunaarummini taama allappoq. Taamaattumik taanna sinnerlugu ineqarnermut attaveqaqatigiinnermullu naalakkersuisoq, Karl Frederik Danielsen nalunaaruteqartuuvoq.
Danmarkimi efterskolertut nunatsinneersut angerlarnissaat ilaqutaasut kissaatigigunikku Danmarkimi Kalaallit Illuutaannut saaffiginnissapput. Nunatsinnut angerlarnerat Namminersorlutik Oqartussat akilissagaat, Karl Frederik Danielsen oqarpoq.
Angajoqqaat allagarsissasut
Nunatsinnut nunatsinniillu pisariaqanngitsumik angalanerit unitsinneqassasut, tunillaassortunik nappaalasoqarneranut ataatsimiititaliarsuup sisamanngormat inassutigigaluarpaa.
Coronavirus nunatsinnut anngutsaaliorniarlugu inuillu angerlarsimaannaqquneqartut amerlitsaaaliorniarlugit taama aalajangerpoq.
Danmarkimi Kalaallit Illuutaanni ilinniartunut siunnersortit allakkanik nunatsinni angajoqqaanut Danmarkimi efterskolertuutilinnut maanna nassiussuileruttorput.
Allakkat taakkua inassutinik ukuninnga imaqarput:
- Atuartoq angajoqqaarsiaminukassaaq - Galtrup Efterskolemi atuartut minillugit, taakkua atuarfimminiiginnassammata
- Atuartoq angajoqqaarsiaminukarsinnaanngippat atuarfik atuartumut nakkutilliisussaatitaavoq
- Atuartoq nunatsinnukaruni atuarfigisanilu ammaqqippat utissaaq
- Atuartoq atuarfigisami ammaqqinnerani utinngippat, atuarfiata maleruagassiai angajoqqaat akiliutaannut il.il. tunngasut atuutissapput
Aalborgimi Københavnimilu Kalaallit Illuutaat naapertorlugit Jyllandip avannarpasissortaani Sjællandimilu atuartut ataasiakkaat atuarfimmik matoqqanerani nunatsinnukarusupput.
Danmarkimi atuarfiit ilimasaarutigineqareersumit sivisunerusumit matoqqassappata, Naalakkersuisut tamanna pillugu nalunaaruteqaqqikkumaartut, Karl Frederiksen Danielsenip tusagassiortunik katersortitsinermi nalunaarutigaa.
