Nunatta Qitornai: Nunatta ministerinngortitsinissaa pingaarnerpaajusariaqanngilaq
- Tamannali nunatsinnut pitsaanerpaaq ujartorlugu anguniagaqarnermut ersiutissaanngilaq, akerlianik politikkikkut qaangerniunnertut oqaatigisariaqarluni. Nunatta Qitornai sinnerlugit Folketingimut qinigassanngortittoq Aleqa Hammond taama isumaqarpoq.
Nunatta Savalimmiullu annertunerusumik akisussaaffimmik piginnaasamillu tunineqarnissaat, ministerinngortitsinissamut taarsiullugu pingaarnerusariaqartoq, Nunatta Qitornai isumaqarput.
Nunatta akisussaaffiit sorliit siulliullugit tiguneqarnissaat kissaatiginerai taamaattoqassappat erseqqissumik nalunaarutigisariaqarai, Nunatta Qitornai oqarput:
- Nunatta ministerinngortitsinissaa pingaarnerpaajusariaqanngilaq, akerlianik suliassaqarfiit suut qaqugu tiguneqassanersut pillugit piffissaliilluni pilersaarummik sulisoqartariaqarpoq. Tamannali pissappat Naalakkersuisut danskillu naalakkersuisoriligassaat piaartumik pilersaarusiortoqarnissaa isumaqatigiissutigisariaqarpaat, Aleqa Hammond, tusagassiorfinnut nalunaarummmi oqarpoq.
Nunatta Qitornaasa inuussutissalerinermut, sullivinni avatangiisit pillugit, nunami allamiut pillugit, silaannartarput imartattalu oqartussaaffiup tiguneqarnissaa qineqqusaarutigaat. Tamannali anguneqassappat aningaasatigut sinaakkutissat annertusisariaqarput, nunatsinnullu isertitat qaffannissaat taamaattumik nukinginnarluni, Nunatta Qitornai oqarput.
Suliassaqarfiilli tiguneqartariaqartut qanoq sukkatigisumik tigusinnaanerat apeqqutaassasoq, Aleqa Hammondip oqaatigaa, soorlu aalisakkanik isumalluutit pissarsissutigineqarnerusalernissaat, nalitunerusunngortitsineq, aatsitassarsiornikkullu suliniutit timitalernerisigut, ersarinnerusumik Kujataani saffiugassat qaqutigoortut pillugit suliniutit marluusut, inerisimanerpaat piviusorsiornerpaajusullu, timitalerneqarnerisigut.
