Nunatta makrelii assortuussutaapput
Norgemiunilli nunanillu EU-mut ilaasortaasunit, aalisakkanik tunisassiorfiit taakku marluk pillarneqarnissaminnit sioorasaartinnertik unammillernartoqartissagunarpaat.
Aalisakkat makrelit eqqarsaatigalugit nuna sanilerput Island, Savalimmiut Danmarkilu peqatigalugit, Nunatsinnit kilisaatinit nunaminnut tuniseqqusinatillu kilisaatinik attartortitserusunngillat.
Tassalu Nunarput makrelilerngusaannermut maanna ilannguttutut oqaatigineqarsinnaalerpoq.
Aalisagaq makreli, ukiuni sisamani kingullerni assortuussutaasarpoq, tassami nunat Island aamma Savalimmiut peqatigiillutik, aalisagartassat qanoq amerlatiginissaannik EU-mut isumaqatigiinniarnerigalui iluatsinneq ajormata. Tamatuma kinguneraa Islandimiut Savalimmiormiullu aalisapilulernerat.
Nunat taakku marluk aalisapilunnerisa kinguneraa, EU parlamentip aalisaqqusiunnaarnissaq siunertaralugu qaammatip tulliani aalajangiiniarnera.
Islandimiut Savalimmiormiullu aalisapilunnerisa kingunera aamma EU-mut tamatuma saqitsaassutaanera eqqarsaatigalugu, Nunatta aalisakkamik makrelimit tunisassiulersinnaanera unammillernartutut oqaatigineqarsinnaavoq.
EU-p aalisaqqusiunnaarnisaanik sioorasaarinera isumakuluutaasariaqanngitsoq, Polar Seafoodip siulersuisuunerini siulittaasoq, Henrik Leth oqarpoq.
- Immat atorneqarnerinut Naalagaaffiit Peqatigiit ataatsimiititaliaata aalajangersagai malillugit, aalisakkat nunap sineriaata imartaaniitut ilangersinnaatitaavagut aamma aalisakkat immartatsinnut aqqusaaginnartaraluarpaluunniit. Taamaattumik Nunatsinni misileraalluni aalisarnerup unitsinniarnissaanik eqqarsarneq pissutissaqanngilaq, Henrik Leth oqarpoq.
Aalisaqqusiunnaarnissamik sioorasaarineq kisimi ajornartorsiutaanngilaq. Aalisakkanik tunisassiorfiit, Royal Greenlandip aamma Polar Seafoodip kilisaatinik makrelerniarnermut naleqquttunik attartorniarnertik aamma ajornartorsiutigisimavaat.
Danmarkimiit, Savalimmiuniit Islandimiillu kilisaatinik attartorsinnaasimannginnerup kinguneranik Royal Greenland Kinamiut kilisaataannik attartortariaqarsimavoq. Polar Seafoodimiillu Chilemit kilisaammik attartortariaqarsimavoq.
- Chilimiut aningaasarsisinnaanngikkunik maannarnavianngillat, soorlu aamma uagut aningaasarsiutiginngikkutsigit aalisarnavianngikkigut. Taamaammat illua tungeriinnut soorunami pissarsissutaassaq. Piginnaatitaaffitsinnik, allatigut qulakkeersinnaasatsinik, Islandimiut akornusersorniarsarimmatigut, pikkorliornertut isikkoqarpoq. Kisianni Islandimiut peqataarusunngikkunik taakku namminneq pissapput, Henrik Leth oqarpoq.
Islandimut makrelinik tunisassianik tulaasseqqusinnginneq unitsitsiniarnertut Henrik Lethip isigaa.
- Aalisakkat nunat marluutaat nunamut tunineqassappata tamanna isumaqatigiissusiornikkut aatsaat anguneqarsinnaasoq Islandimiut utoqqatsissutigaat. Taamali oqarneq tunngavissaqanngilaq inatsisaananiluunniit. Nunat allamiut Islandimut siorna tulaassuipput, Nunarpulli taamaaliornialermat tassa ajornasaartitsillutik, Polar Seafoodimi siulersuisut siulittaasuat, Henrik Leth taama oqarpoq.
