Nunatta kisimiinniarnini taamaatippaa

- Isummatsinnik ataqatigissaarineruvoq, nunat akornanni paatsooqatigiittoqannginniassammat.

Issittumi Siunnersuisoqatigiit ataatsimiittarnerini inissat naalagaaffeqatigiinni agguataarneqartarnerannut periusissat pillugit ataatsimiinneq Savalimmiuni naalakkersuisut siulittaasuata taama taavaa.

Ataatsimiinneq taannarpiaq pillugu Naalakkersuisut siulittaasuat Aleqa Hammond tusagasssiuutinut nalunaaruteqarluni ima oqaatigaa.

- Naalagaaffeqatigiit tamarmiullutik erseqqissarpaat, naalagaaffeqatigiit pingasuusut tamarmik Issittumi Siunnersuisoqatigiinni suleqataanissaat pingaaruteqartoq. Tamannalu pillugu isumaqatigiissutigineqarpoq, pineqartoq pillugu canadamiut siulittaasuutitaqartut nangittumik oqaloqatiginissaat.

Taama nalunaaruteqarneq Naalakkersuisut siulittaasuata siornatigut nalunaarutigisimasaanit allaaneruvoq, tassami Kalaallit Nunaat Issittumi Siunnersuisoqatigiit kisimiilluni, imaluunniit Savalimmiormiut minillugit Danmark peqatigalugu issiatitaqarnissamik nalunaaruteqarami.

Issittumi Siunersuisoqatigiinni ataatsmeeqataanissami isummamik allanguineq pillugu Aleqa Hammond oqaaseqarusunngilaq.

- Una ajornartoornermi ataatsimuususeq qularnaarnniarlugu ataatsimiinerunersoq Savalimmiuni naalakkersuisut siulittaasuannut  Kaj Leo Holm Johannesen-imut apeqqutigaarput.
- Politikimik sulininnni ajornartoornerit aqqusaartarsimavakka, uani ataatsimiinneq ajornartoornermi atatsimiinnerusimappat, taava ajornartoorneq iluarusunnarluinnartuusoq oqartariaqarpunga, Kaj Leo Holm Johannesen oqarpoq.

Ajornartoornertut misigisimananngilaq isummagut ataatsimoortutut malunnarput, nunat akornanni patsuungassuteqartoqarani, Savalimmiuni naalakkersuisut siulitttasuat oqarpoq.
Issittumi siunnersuisoqatigiit ataatsimiineranni  naalagaaffeqattigiinni nunat pingasuusut assigiimmik periuseqassasut, nunat naalagaaffeqatigiinni ilaasortaasut ataatsimoorlutik qaammatip ataatsip matuma siorna nalunaarutigaat.

Tamatuma kinguninngua nipi alla Kalaallit Nunaannit tutsiuppoq.

Inatsisartuni nunanut allanut tunngassuteqartut pillugit ataatsimiititaliami siulittaasoq Per Berthelsen radioaviisimut oqaluttuaraa, Issittumi Siunnersuisoqatigiit siunissami suleqatiginissaanut Kalaallit Nunaat periusissaminik pilersaaruteqartoq, suleqatigiinnermi Danmark Savalimmiullu peqataasariaqanngitsut.
Kalaallit Nunaata allatut periuseqarniarnera pissutigalugu naalagaaffeqatigiit ataatsimeeqqittariaqarnerattut isikkoqarpoq.

Savalimiormiuni naalakkersuisut siulittaasuata ataatsimoorluni aaqqiissuteqarnissaq ajunngitsuusoq qulakkeerlugu oqaatigaa, assersuusiorporlu:

- Ilaquttat ilaasa ilaluarineqannginnissaat pingaaruteqartorujussuuvoq.

Kalaallit Nunaat Savalimmiut avaqqullugit periuseqarniartutut isigineraa Kaj Leo Holm Johannesen aperineqarami oqarpoq nammineq Savalimmiuni naalakkersuisut siulittaasuattut oqaaseqarsinnaanani  Kalaallit Nunaatalu periusissamittut saqqummiunniagai ataqqillugit, Kaj Leo Holm Johannesen oqarpoq.

Inatsisartut nunanut allanut tunngasuteqartut pillugit ataatsimiititaliami ilaasortaq Sara Olsvig IA- isumaqarpoq,  Kalaallit Nunaat Issittumi Siunnersuisoqatigiinni sunniuteqarnerulernissaanut suliniuteqartoqarmat, allanillu ilaasoqannginnissamik iliuuseqarniarneq iluanngitsuusoq tassami  Kalaallit Nunaata Savalimmiullu akornanni akersuuttoqannginissaa Sara Olsvig-ip kissaatigigamiuk.

- Tassami, uagut naligiittut isigineqarusukkutta soorunami aamma peqatigut naligalugit isigissavagut. Isumaqarpunga aamma pingaaruteqarluinnartoq, Kalaallit Nunaata Savalimmiullu akornani taamatut akersuuttoqalissanngitsoq unammisoqalissanngitsorluunniit. Pingaruteqarluinnarpoq, uagut nunat namminersortuusugut ataatsimuussasugut suleqatigiissinnaassasugullu, IA sinnerlugu Inatsisartunut Folketingimullu ilaasortaq Sara Olsvig oqarpoq.