Nunatta karsia 2019-imi amigartooruteqarnani sinneqartooruteqartoq
Nunatta karsia 142 millionit koruuninik siorna sinneqartooruteqarpoq. Angusarlu Naalakkersuisut ilimagisaanninngaanniit pitsaanerujussuuvoq.
Politikerimmi 48 millionit koruuninik 2019-imi amigartooruteqarnissamik aningaasanut inatsimmi missingersuuteqarput.
Tassalu angusaq missingersuutigineqartumit 190 millionit koruuninik pitsaaneruvoq.
AAMMA ATUARUK Nunatta karsiata 2017-imut naatsorsuutai sinneqartoorfiusut
Ilaatigut isertitaqarneruneq angusaqarluarnermut pissutaavoq. Soorlu eqqussuinermi akitsuutit, naqitsinermut akitsuutit, qamutit motorillit akitsuutaat, suliffeqarnermi akitsuut kiisalu qaleralinnut akitsuut ilimagineqartunit katillugit 53 millionit koruuninit amerlanerusunik isertitsissutaapput.
Namminersorlutik Oqartussat tusagassiuutinut taama nalunaarput.
Aningaasaqarnermut naalakkersuisoq, Vittus Qujaukitsoq, naapertorlugu, sinneqartooruteqarneq aningaasaqarnermut politikkeqarluarnermut takussutissaavoq.
- 2019-imi pitsaasumik angusaqarnerup Kalaallit Nunaata aningaasaqarnerata Coronamik tunillaassuunnermik eqqorneqarnerput sioqqullugu nukittunera takutippaa, Qujaukitsoq oqarpoq.
AAMMA ATUARUK Coronap ajornartorsiortitsinera: Naalakkersuisut 2,5 milliardit koruunit tungaannut atorniartut
Coronavirusilli ajornartorsiortitsinera nunatta aningaasaqarneranut nalorninartoqartitsivoq.
- Coronap tunillaassuunnera Nunatta Karsiata aningaasanik uninngasuutaanik annertuumik atuinermik nassataqarpoq. 2019-imilu sinneqartoorutit taakku matussusernissaannut naammanngillat, Vittus Qujaukitsoq oqarpoq.
Coronavirusilu qaqugu ajornartorsiortitsiunnaassanersoq nalunartoq, ilanngullugu erseqqissaatigaa.
- Taamaammallu Nunatta Karsianik annertunerusumik nammakkiinissamut nutaanilluunniit aningaasartuuteqartitsinissamut suli annertuumik tunuarsimaartoqartariaqarpoq, aningaasaqarnermut naalakkersuisoq, Vittus Qujaukitsoq oqarpoq.
