Nunatta Kangiani Meeqqat Isummersorfeqarfiat: Silami ernguttut tassa
UNICEF Danmarkip aamma Namminersorlutik Oqartussat suleqatigiinnerisigut suliniutigineqartoq NAKUUSA pilersinneqarsimasoq aaqqissuisuuvoq, aggustillu naalernerani Tasiilamiitilluni isummersorfeqarfik pilersillugu.
Ataatsiminnermi siullermi ulloq aggustip 31-ani Tasiilami toqqissisimasumik meeraaneq pillugu meeqqat eqqarsaataat isumaallu ukkatarineqarput.
Meeqqat Isummersorfeqarfiannut ilaasortap silami ernguttut misigisaqai
16 -inik ukiulik Julius Singertat ilaasortat ilagaat aqqusinernilu ernguttoqartoq, kamaattoqartoq annersaasoqartorlu misigisarpaa.
- Tamanna toqqissisimajunnaartitsisarpoq meeqqallu ersiortinneqartarlutik. Meeqqat kannguttaatsuliorfigineqarnissaminnut ersisarput, toqqissisimaneq ajorput, oqarpoq.
AAMMA ATUARUK NAKUUSA Tasiilami: Innuttaasunit tigulluarneqaqaagut
- Tasiilaq annertuumik sammineqartarpoq meeqqallu isumaat oqariartuutaallu toqqaannartumik tusassallugit pisariaqarpoq. Taamaammat Nunatta Kangiani Meeqqat Isummersorfittaarnissaq pingaaruteqarsimavoq, Sara Olsvig, UNICEF-ip Kalaallit Nunaanni suliniutinut pisortaa oqarpoq.
NAKUUSAmi suliniummik aqutsisoq Najaaraq Møller oqaluttuarpoq inuusuttuaqqat ilaasortanngortut tamarmik immikkut piginnaasaqartut.
- Taamaattumik neriulluarpunga uku Meeqqat Isummersorfigiligaat Nunatta Kangianit tusarniaaffigineqaannaratik suliniutaannik tapersersorneqartualissasut”, oqarpoq.
AAMMA ATUARUK Tasiilaq: Atsiornernik katersisoqaraluartoq isumaginninnikkut siuariartoqanngitsoq
Upernaaq manna DR2-p aallakaatitassiaa piviusulersaarut ”Byen hvor børn forsvinder” aallakaatinneqarmat meeqqanut kanngutaatsuliorneq pingaartorujussuutinneqarpoq. Aallakaatitami inuiaqatigiit sammineqarput, taakkunanilu meeqqat pingajorarterutaat kinguaassiuutitigut kanngutaatsuliorfigineqartarput, meeqqallu Kommuneqarfik Sermersuumi isumaginninnikkut suliassanngortitaallutik.
Aallakaatitsinerup kingornatigut nunatsinni oqallinnerup kinguneraa Inatsisartuni amerlanerussuteqartut piumasaqarmata Naalakkersuisut meeqqanut inuusuttunullu isumaginnittoqqarfiup ikiorserneqarnissaa pillugu danskit naalagaaffiannut saaffiginnissasut.
Manna tikillugu akisussaalluni naalakkersuisoq Martha Abelsen kommuninut apeqquteqarpoq ikiorneqarnissaminnut qanoq ittunik pisariaqartitsinerinik. Kommuneqarfik Sermersooq kommunit Danmarkimit ikiorserneqarusuttut ilagaat, qanittorlu isigalugu Tasiilamil sulisunik nutaanik 17-inik massakkullu sulisut pikkorissartinnissaannik kissaatinik allattukkanut ilanngussilluni.
