NAKUUSA Tasiilami: Innuttaasunit tigulluarneqaqaagut

Meeqqanut isummersorfik kiinnanik ilisarnartunik ilaqarluni sapaatip akunnerani matumani Tasiilamiippoq. Illoqarfiup meerartaasa naapinnissaat meeqqanullu isummersorfimmik pilersitsinissaq angalanerup siunertaraa.

- Assut tigulluarneqarpoq. Inuppassuupput naatsorsuutigisanninngaanniit inoqarnerujussuuvoq, NAKUUSA-mi suliniutinut aqutsisoq, Najaaraq Møller oqarpoq.

Angalanermi isikkamik arsartartut marluk aamma KNR-imi meeqqanut aallakaatitassiortartoq, Sikkerneq Olsen angalaqataapput.

Najaaraq Møllerip oqarnera naapertorlugu meeqqat naapitsinertik nuannaraat.

- Nunatsinni maligassiuisunik angalaqateqarpugut, Najaaraq Møller oqarpoq.

Inuunerissuunissamut periarfissaqarneq

Angalanermili meeqqat isummersorfittaarnissaat siunertaavoq, taamaalilluni Tasiilami meeqqat nipaat ataatsimut isiginiarneqarnerulissalluni.

- Nunatta kangiani meeqqat oqariartuutaasa tusarnissaat qilanaaraarput, Najaaraq Møller oqarpoq.

NAKUUSA-p Tasiilami najuunnerata meeqqat inersimasullu meeqqat pisinnaatitaaffiinik ilisimasaqarnerulernissaat soorlu ineriartornissamut pisinnaatitaaffeqarneq, nakuusertoqarnerani kinguaassiutitigullu atornerlunneqarnermi illersorneqarneq oqaaseqarnissamullu pisinnaatitaaffeqarneq pillugit ilisimasaqarnerulernissaat.

AAMMA ATUARUK Børn i Tasiilaq får hjælp til at komme ud med deres budskab

Tasiilami meeqqat isummersorfianik pilersitsinissamik pilersaaruteqarneq siorna aallartinneqarpoq, DR-illi isiginnaagassiaata piviusuinnik tunngavillip Tasiilami susassaqarfimmut tassunga tunngatillugu pisariaqartitsisoqarnerungaatsiartoq takutippaa.

Najaaraq Møllerip Tasiilami ajunngitsorpassuarnik pisoqartarnera erseqqissaatigaa.

- Tasiilami tusarneq ajukkatsinnik ajunngitsorpassuarnik pisoqartarpoq. Inuunerissuunissamut kivitsissutaasinnaasunik periarfissarpassuaqarpoq.