Nunatta IWC-mit ilaasortaajunnaarnissani eqqarsaatigaa
Nunarput arfanniarneq pillugu ataatsimiititaliarsuarmi IWC-mi ilaasortaaginnassanersoq, 2010-mi isummerfissat pingaaruteqarluinnartut ilagissagaat, naalakkersuisut siulittaasuata Kuupik Kleistip, ukiortaami oqalugiaammini ilaatigut oqaatigaa.
Ataatsimiititaliarsuarmi ilaasortat akunnerminni assortuunnerat Nunattalu qipoqqartassiissutissanik qinnuteqataata itigartinneqartuarnera tunngavilersuutigineqartut piniarnermut naalakkersuisoq Ane Hansen oqarpoq.
- Uumasunik illersuiniaqatigiit sunniinerat pissaanerallu maannamut annertusiartuinnarsimavoq, kinguneranillu nungusaataanngitsumik piniarneqarsinnaasutut isigalugit ilisimatuussutsikkut ataatsimiititaliap innersuussutigisartagai malinneqartaratik, Ane Hansen oqarpoq.
Tamanna nunatta soqutigisaanut naapertukkunnaariartortoq Ane Hansen isumaqarpoq.Taamaammat Nunatta IWC-mit ilaasortaajunnaarsinnaanera naalakkersuisut eqqarsaatigaat.
Arfanniarneq pillugu ataatsimiititaliarsuarmi immikkut ittumik Floridami ataatsimeersuartoqassaaq, marsip sisamaani tallimaanilu. Ataatsimeersuarnermi pisussat aallaavigalugit Nunatta ataatsimiititaliarsuarmi ilaasortaaginnarnissaa aninissaaluunniit aalajangerneqassasoq, Ane Hansen oqarpoq.
- Kalaallit Nunaata qipoqqartassiissutinik qinnuteqaatigisartagai ukiut pingajssaannik itigartinneqartarput. Illersorneqarsinnaasumik nungusaataanngitsumillu ilisimatuussutsikkut ataatsimiititaliat innersuussaralui akuerineqarneq ajorlutik, tassalu Kalaallit Nunaata qulinik qipoqqartassinneqarnissaanik innersuussutik. taakkuluunniiit akuerineqanngippata ingerlaqqinnissamut tunngavissat annikinnerulissapput. Nunat arfanniartartut taavalu arfanniarnermi soqutigisallit akornanni assortuunneq ingerlaannassappat ingerlaqqinnissamut naliliisariaqarpugut
Arfanniarneq pillugu ataatsimiititaliarsuarmut taarsiullugu, NAMMCO, FN-ip imaani pissutsinut ataatsimiititaliarsuanit akuerisaasoq, nungusaataanngitsumik arfattassiisarfissatut Naalakkersuisuni eqqarsaatigineqarpoq. Tassanili ilaasortaasut oqaloqatigineqaqqaassapput.