Nunatta Issittumi Siunnersuisooqatigiinni sunniuteqaqataanerunissaa Canadap isumaqataaffiginngilaa

Issittumi Siunnersuisooqatigiit siullerpaamik naggueqatitsinnik siulittaasoqalerput. Canadamiut peqqinnissamut ministeriat Leona Aglukkaq ukiuni tullerni marlunni Issittumi Siunnersuisooqatigiit siulittaasuuffigisussanngorpai. Taamaakkaluartoq Kalaallit Nunaata Canadap Sverigemit allaanerusumik isummernissaa naatsorsuutigissanngilaa.

Leona Aglukkap Issittumi Siunnersuisooqatigiit pilersinneqarmata Ottawami nalunaarut 1996-imeersoq innersuussutigaa.

- Nalunaarummi issittumi naalagaaffiit arfineq pingasut akuerineqarput, tamannalu attatiinnarneqassaaq. Kikkut Issittumi Siunnersuisooqatigiinniissanersut nalunaarummi 1996-imi atsiukkatsinni erseqqilluinnarpoq. Tamannalu ullumikkut suli atuuppoq.   

Danskit nunanut allanut ministeriata Savalimmiut Kalaallit Nunaatalu Issittumi Siunnersuisooqatigiinni peqataatinneqarnerunissaannik Canadamut - siulittaasuutitaqarnermi nalaani - qulakkeerinneqqusigaluartoq, Leona Aglukkaq isumaqarpoq apeqqut tamanna Danmarkip Kalaallit Nunaatalu akornanni aaqqinniagassaasoq.

- Kalaallit Nunaat Danmarkip ataaniippoq. Kalaallit Nunaatali Issittumi Siunnersuisooqatigiinnut immersueqataanissaa iluatinnartupilussuuvoq. ICC maannakkorpiaq kalaallimik siulittaasoqarpoq, tamannalu sulinitsinnut iluatinnartupilussuuvoq. Taamaammat Kalaallit Nunaata danskillu nunanut allanut ministeriata ajornartorsiummik matuminnga iluminni aaqqiiniarnissaannut kaammattorusuppakka.

Kalaallit Nunaata ataatsimiinnermi ullumi peqataannginnera peqatigitillugu ajuusaarutiginerarpaa.

- Kalaallit Nunaanni naalakkersuisut siulittaasortaavat ajoraluartumik maaniinngilaq. Nalunngisaraara, Iqalunnimi najugaqarnikuuvoq. Issittumi Siunnersuisooqatigiinni ilaasortanik naapitsinissaminut sulinittalu pingaaruteqartup paasisaqarfiginissaanut periarfissani maangaannartippaa.

Aleqa Hammond aalajangersimanini isumaliutigeqqeqqullugu attaveqarfigissamaarpaa.