Nunatta Isiginnaartitsisarfia isiginnaartitsisartut peqatigiiffiinik isumasioqatigiissitsilersoq

Tassami  Nunatta isiginnaartitsisarfiata saniatigut Nunatsinni illoqarfinni nunaqarfinnilu assigiinngitsuni nammineq kajumissutsiminnik isiginnaartitsisartunik peqatigiiffeqarpoq.

Rosa Olsen, immaqa amerlanernit Tariisiatut ilisimaneqartoq, Nunatta Isiginnaartitsisarfiani nammineq kajumissutsiminnik isiginnaartitsisartut peqatigiiffiinut siunnersortaavoq isumasioqatigiinnermillu aaqqissuisuulluni.

Nunarput tamakkerlugu taama amerlatigisunik peqataaniartunik sinerissamit nalunaartoqarnera taassuma nuannaarutigaa:

- Sapaatip akunnerani oqallittoqarluarnissaa aamma isiginnaagassiorluta nuannisaqatigiinnissarput qilanaaraakka. Isumasioqatigiinnerup ukiut tamaasa pisalernissaa neriuutigaara, immitsinnummi ilinniarfigeqatigiinnissarput pisariaqartikkatsigu, isumasioqatigiinnissaq sioqqullugu Rosa Olsen oqarpoq.

Isiginnaartitsinermik suliaqarnerminnik nutaanik isumassarsitinniarneqartut

Isiginnaartitsisartut peqatigiiffii tallimat, tassa Ilulissaneersoq, Innaarsunneersoq, Maniitsumeersoq, Qaqortumeersoq aamma Sisimiuneersoq peqataatitaqassapput, taakkulu ilaatigut isiginnaartitsinermi periaatsinik assigiinngitsunik, aamma    isiginnaartitsissummik allannermik pikkorissartinneqassapput, taamaalillutik isiginnaartitsinermik suliaqarnerminnik nutaanik isumassarsitinneqarniassammata, Rosa Olsen oqarpoq.

Danmarkimi nuna tamakkerlugu nammineq piumassutsiminnik isiginnaartitsisartut peqatigiiffianneersumit aamma eqqumiitsuliortumit Peter Kujooq Kristensenimit pikkorissarneqassapput, ilaatigut isiginnaartitsinermi atortussanik aamma isiginnaartitsiviup tunuliaqutissaanik suliaqarnermik pikkorissarneqassallutik.

Isiginnaartitsisartut sinerissameersut isumasioqatigiinnertik naggaserlugu Nuummiunut tallimanngorpat isiginnaartitsissapput.
 
Tamanna pissalluni Nunatta isiginnaartitsisarfiani juunip aqqaneq aappaanni unnukkut arfineq marluniit qulit tungaanut.