Nunatta ineriartornissaanut CO2-mik killiliussaq eqqartorpaat

Kalaallit Nunatta nukissiorfinnik aatsitassarsiornermillu ingerlatsinerulernissaanut atatillugu siunissami CO2-mik aniatitsinerulernissamik kissaataa danskit politikerillu oqallissutigaat.

- Avatangiisinik mingutsitsinnginnissaq eqqarsaatigigaangakku, paasisinnaaneq ajorpakka gassinik (silaannarmik) kissakkiartortitsisartunik CO2-mik isumaqatigiissutaareersut qummut qaangerlugit aniatitserusuttartut. Tassami millisaanissaq tamatta siunertarigatsigu. Kalaallit Nunaatali suliffissuarnik ineriartortitsinerminut atatillugu siunissami CO2-mik aniatitsinerunissamik kissaataa paasisinnaalluarpara. Aaqqiissutissanillu tamatsinnut naammaginartunik nassaarusunnaassaqaaq, Avatangiisinut nukissiuuteqarnermullu ministeri Connie Hedegaard Danmarkip Radioata ullaakkut aallakaatittagaani P1-imi ullaaq taama oqarpoq.

Naalakkersuisut siulittaasuata Kuupik Kleistip Connie Hedegaardillu isumaqatigiinniarnerat suli ingerlavoq.

Avatangiisinulli ministerip kalaallit CO2-mit siunissami maannakkornit 14-eriaammik annerusumik aniatitsisalernissamik kissaataa akuersaarpallaanngilaa.

Danmarkimili politikerit allat akuersaarlutik tutsiuttalereerput, pingaartumik saamerliiit ilaat SF aamma Enhedslisten. Enhedslistenimeersoq Per Clausen ima oqarpoq:

- Nunat killiit pisuut, taakkununnga Danmarki ilaalluni, isumaqatigiissusioreernerup kingorna CO2-mik - nunarsuup sinnerani isumannaatsumik aniatinneqartussatut killiliussap iluani anianitsisarnissaa qularnanngilaq. Taamaammat Danmarkimi aniatinneqartussamut atatillugu killiliussap iluani Kalaallit Nunaat immikkut akuerineqarsinnaassasoq takorloorsinnaavara, Per Clausen oqarpoq.

Enhedslisten-ikkunnit talerperliulaartut SF-ikkut oqaatigaat Kalaallit Nunaat akiitsoqarfigineqartoq. Kalaallit Nunaanni sermersuup aakkiartornera silap pissusaata allanngoriartorneranut uppernarsaatitut Danmarkimi oqartussanit takutikkiartorneqaqattaartuarpoq, taamaammat Kalaallit Nunaata piumasai aamma tusaaneqartariaqartut SF-imit isumaqarfigineqarpoq.

- Anders Fogh Rasmussen statsministeriunermini aamma Connie Hedegaard qasseeriaqalutik angalaqatigiinnik Ilulissat kangerluannut sermersuarmik takuniaatitsipput, taamaammat Kalaallit Nunaat akillugu akuersaartariaqartut isumaqarpunga, SF-ip nukissiuuteqarneq pillugu folketingimi oqaaseqartartua Anne Grethe Holmsgaard oqarpoq.

Taamali oqarnera Connie Hedegaardip isumaqatiginngilaa. Kalaallit Nunaat silap pissusaata allanngorneranit nammineq eqqugaalluni, sooq CO2-mik anianitsinerunissamik kissaateqassava, oqarpoq.

- Nunani tamalaani politikerit akornanni nassuiaruminaassaaq, eqqugaasut, silap allanngorneranit eqqugaasuni nittarsaassiffiunerpaat ilaat, sooq immikkut pineqassanersoq. Taamaammat periarfissanik misissuilluaqqaarnissaq pingaartippara. Kalaallit Nunaannimi inuiaqatigiit immikkuullarissuupput, Connie Hedegaard oqarpoq.

Folketingimi ilaasortaq Juliane Henningsen isumalluarpoq. Aporfissaqassagaluartoq kalaallit piumasartik angussaqqaaraat oqaatigaa.

- Upperaara nalornissutiginagulu isumaqatigiittoqarumaartoq. Connie Hedegaardimuna akuerisariaqaraa Naalagaaffeqatigiinneq tassaannaanngimmat Danmark - Danmarkillu sila pillugu sinnattui. Kalaallit Nunaat naalagaaffeqatigiinnut ilaasoq akuerisariaqarpaa, taamaalilluni aamma akueralugu Kalaallit Nunaata namminersornermini pisuussutinik nammineq atorluaalluni aningaasaqarnermigut imminut napatikkiartulernissaa, Juliane Henningsen naggasiivoq.

Silap pissusaa pillugu isumaqatigiinniarnerit nangillugit Naalakkersuisut siulittaasuat Kuupik Kleist aamma Connie Hedegaard septembarip ulluisa 15-ianni tullianik ataatsimiissapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat