Sermersuaq ukiukkut aamma aakkiartortartoq
Nunatsinni siallertarnera nalinginnaaleraluttuinnarpoq, tamannalu ilutigalugu Sermersuup suli sukkanerusumik aakkiartortoq, ilisimatuut nalunaarusiaanni nutaami allassimavoq.
BBC naapertorlugu ilisimatuut nalunaarusiortut issittup ukiukkut siallertarnera uissuummissutigaat.
Sermersuaq aakkuni imavissuarnut 7 meterinik qaffatsissisussamik imermik qerinikumik annertuumik ilaqarmat malinnaaffigeqqissaarneqarpoq.
Ilisimatuut sumi aakkiartornera qaammataasamit assit atorlugit malinnaaffigaat.
Qaammataasamit assit silasiorsinnit 20-nit qanoq siallertigisarneranik sumilu siallertarneranik nalunaarsuisartunit paasissutissanut sanilliunneqartarput.
AAMMA ATUARUK Sermersuup aakkiartornera unitsitassaajunnaareerpoq
Misissuinerit 1979-imi aallarteqqaarnerannit ukiuunerani marloriarluni siallertartoq nalunaarsorsimasoq, paasissutissat nutaat pillugit atuagassiami, The Cryospheremi saqqummersinneqartuni atuarneqarsinnaavoq.
2012-imi ukiuunerani aqqaneq-marloriarluni siallersimavoq.
1979-imit 2012-imut siallernernit 300-nit amerlanerusuni sialuk sermimik aatsitsisartoq misissuinerit takutippaat.
Aasaanerani kiassutsip qerilerfimmiinnerani amerlanertigut pisarpoq. Ukiuuneranili qaammatini kiassutsip qerilerfimmiinnissaata naatsorsuutigineqarsinnaanerini qaffakkiartortuinnarpoq.
- Ukiuunerani siallertarnera uissuummissutigaarput, ilisimatuut misissuineranni siuttoq, Tysklandimi imartat pillugit suliaqarfimmit, Geomarimeersoq, Marilena Oltmanns BBC-mut oqarpoq.
AAMMA ATUARUK Sermersuaq aatsaat taamak aakkiartortigaaq
Ilisimatuup allap misissuinermi suliaqaqataasup, New Yorkimi Columbia Universitetimeersup, Marco Tedescop siallertarnera kinguneqapilunnerarpaa.
- Naak ukiuunerani sialleraluartoq sermerlu sukkasuumik qereqqittaraluartoq tamanna Sermersuup qaavanut allannguisarpoq. Sermeq aqinnerulerlunilu taarnerulertarpoq tamannalu sukkanerusumik aakkiartortitsisarluni, Marco Tedesco oqarpoq.
Sermeq taarnerugaangami seqinermit kissarnermik tigoqqaanerusarpoq aakkiartornermullu tamanna sukkanerulersitsisarluni.
- Tamanna misissuiffigissallugu pingaarluinnartumut matumik ammaavoq, Tedesco aalajangersumik oqarpoq, nangillunilu:
- Ukiuunerani upernaakkullu pisartut allannguutigisinnaasaat aasaaneranut sunniinerat misissuiffigineqartariaqarpoq.
/ritzau/
