Nunatta ilaani aatsaat taama kiatsigimmat sermeq milliardikkuutaartunik oqimaatsigisoq aattoq

Nunatta kangiani kiarujussuarmat, sermersuaq ilanngangaatsiarsimasutut ilisimatuunit sapaatit akunnerani matumani nalunaarsorneqqarpoq.

The Guardian taama allappoq.

Kiak nunatta qiterpasissuanut annguppoq, sermersuarmilu sermeq 8,5 milliardit tonsitut oqimaatsigisoq marlunngormaannaq aalluni. Tamanna Polarportal.dk-ip DMI-mit GEUS-imiillu ingerlanneqartup paasissutissaataasa takutippaat.

Aamma sermeq 8,4 milliardit tonsitut oqimaatsigisoq sisamanngormat aappoq, sermersuarmilu aakkiartortoqartorujussuusoq Columbia Universitymit sermeq iigartartoq pillugu ilisimatooq Marco Tedesco oqarpoq.

- Aakkiartornermik sukkatsikkiartortitseqataassammat, Kalaallit Nunaata qaavanik allannguissagunarpoq, taamaalillunilu imavissuarnik qaffaassalluni, Marco Tedesco The Guardianimut oqarpoq.

Taassuma nassuiaatigaa, naqitsinertuffik kiammik kujataaninngaanneersumik pujoralaajaattut maanna millussisoq, kiallu nunatta kangiata avannaaniitillugu.

Taamaattoqarajunnerusoq sivisunerusarlunilu

Taamaalilluni nunap ilaa 19,8 gradimik kiaffiutigisutut nalunaarsorneqarpoq, tassalu aatsaat taama kiatsigisutut nalunaarsuiffiulluni.

- Silaannarmut tunngasuni assingusumik siusinnerusukkut takusaqartareerpugut, maannali sivisunerusarpoq taamaakajunnerullunilu, Marco Tedesco oqarpoq.

Inuit iliuusaannit silap pissusaata allanngoriartornera pissutaanerpaasoq, taanna oqarpoq.

Nunarput juunimit aggustimut nalinginnaasumik aaffiusarpoq.

DMI naapertorlugu nunatsinni sermeq 100 milliarditut oqimaatsigisoq juunip aallartinneranit aappoq. Aattullu angissusaa 2019-imi aanneranit minnerugaluartoq, silap kiannera nunap ilaanut annertunerujussuarmut sunniuteqarpoq.