Nunatta folketingimi ilaasortaatitaqaannarnissaa Radikalit piumavaat
Namminersornerup atuutilerneratigut kalaallit folketingimi ilaasortaatitaqarnerat pisariaqartinneqarpoq. Kalaallit Nunaat folketingimi ilaasortaatitaqarneratigut, Kalaallit Nunaanni pissutsinik paasissutissanik pisariaqartinneqartunik tunniussaqartarput, Niels Helveg Petersen oqarpoq.
Kalaallit folketingimi ilaasortitaat folketingimi qinigaasut allat assigalugit pisinnaatitaaffeqarput, sunullu tamanut akulerissinnaallutik. Aviisimi licititationimi pingaarnerutillugu allaaserineqarpoq, Atlantikup avannaani folketingimut qinigaasut pingaaruteqartunik taasisoqassatillugu aalajangiisunngorsinnaanerat, ilaatigut eqqaaneqarluni, qallunaat 5,6 millionit talerperlernik saamerlernilluunniit naalakkersuisuutitaqassanersut aalajangiisuusinnaanerat.
Tamanna pillugu Niels Helveg Petersen oqarpoq, taamatut eqqarsartut Danmarkimi ikittuinnarnik tapersersorneqartut, partiit folketingimi ilaasortaatitaqartut naalakkersuisuutitaqartullu isumaqarput, Atlantikup avannaani ilaasortaatitat, folketingimi ilaasortaasut allat 175-it assigalugit atugassaqartitaammata pisinnaatitaaffeqarlutillu, taamaattumik allatut akerlianilluunniit isumaqartut Danmarkimi tapersorneqarnerat annikitsuinnaasoq, Niels Helveg Petersen oqarpoq.
Danskit naalagaaffiata oqartussaaffii Kalaallit Nunaannit oqartussaaffigineqalersut amerliartortillugit kalaallit folketingimi ilaasortaatitaqarnerat pisariaarukkiartussannginnami?
- Namminersorneq pillugu inatsisip nutaap atuutilernera atortariaqarparput taassumalu periarfissai, taamaattumik qanorluunniit ikkaluarpata, kalaallit folketingimi ilaasortaatitaqarnerat tusarneqarnissaallu pisariaqartinneqassaaq. Kalaallit namminneerlutik folketingimi ilaasortaatitaqarnertik pisariaqartinngikkunikku tamanna kingusinnerusukkut aalajangiiffigineqartariaqarpoq. Kalaallit Folketingimi ilaasortaatitaarukkaluarpata, uanga isumaga malillugu annaasaqaataassaaq, Niels Helveg Petersen oqarpoq.
