Nunatta eqqartuussisuuneqarfia aalajangersaavoq: Nuummi suliffeqarfik akileraartarsimanngilaq

Nuummi suliffeqarfik akileraartarsimannginnini pissutigalugu 20.000 koruuningajannik akiligassinneqarpoq.
Eqqartuussut Eqqartuussiveqarfik Sermersuup inerniliussimasaa Nunatta Eqqartuussisuuneqarfiata ataasinngormat aalajangersarpaa. Kalaallit Nunaanni politiit tusagassiuutinut nalunaarummi allapput. Assi © : KNR
januaarip 29-at 2020 10:22

Suliffeqarfik Nuummiittoq Akileraartarnermut Aqutsisoqarfimmut A-skatsinut aamma suliffeqarnermut akitsuutinut akiliisarsimannginnini pissutigalugu akiliisussanngorpoq.

Eqqartuussut Eqqartuussiveqarfik Sermersuup inerniliussimasaa Nunatta Eqqartuussisuuneqarfiata ataasinngormat aalajangersarpaa. Kalaallit Nunaanni politiit tusagassiuutinut nalunaarummi allapput.

Suliffeqarfiup 19.276 koruunimik akiligassinneqartup aqqa politiit paasissutissiissutigerusunngilaat.

- Akileraartarnermut Aqutsisoqarfiup Nuummi suliffeqarfik politiinut unnerluutigaat, suliffeqarfiup sulisumi 2014-imi maajimit 2017-imi aggustimut akissarsiai tigummiinnarlugit A-skatinut suliffeqarnermilu akitsuutinut akiliisarsimanngitsoq, politiit allapput.

Suliffeqarfiit sulisuminnut akissarsititsigaangamik suliffeqarfik nalinginnaasumik sulisumi akissarsiaannit akileraarutinut suliffeqarfinnullu akitsuutinik akiliisartussaavoq. Suliffeqarfiup aningaasat tigummiinnakkani Akileraartarnermut Aqutsisoqarfimmut akilertartussaavai.

- Suliffeqarfiup aningaasat naapertuuttut tunngaviusumik akilinngikkaangamigit tamanna Inatsisartut aningaasarsiani aningaasarsianit akileraartarnissamut suliffeqarnermullu akileraarutinut inatsisaannik unioqqutitsinerusarpoq, tusagassiuutinut nalunaarummi allassimavoq.

Eqqartuussisuuneqarfiup aalajangernera unnerluussisussaatitaasut suliamut piumasaqaataanut naapertuuppoq.

Akileraartarnermut Aqutsisoqarfik suliffeqarfik pillugu unnerluutiginnittuuvoq.