Nunatta Angalatitsivia 2013-imi sinneqartooruteqarpoq
Angalatitsiviup pisortaanerata Peter Bastrupip naatsorsuutit taama inerneqarnerat nuannaarutigaa, Nunatsinni Danmarkimilu inuinnaat amerlanerusut angalasalersimanerannik, suliffeqarfiillu angalatitsisalernerusimanerannut tamanna takussutissaanerarlugu.
Suliffeqarfiit angalanissamut atatillugu nittartakkatigut inniminniisinnaanngorsimanerat ilaatigut aamma pissutaasoq, pisortaanerup oqaatigaa:
- Suliffeqarfiit sukkasuumik akikitsumillu nittartakkatigut inniminniisinnaanngornikuupput, suliffeqarfiit angalasarnissamut politikkimik pilersitsisinnaanngornikuullutik. NAIA-mik taallugu inniminneeriaaseq suliffeqarfinnut iluaqutaassaaq, pitsaanerusumik pilersaarusiorsinnaanngorlutillu aningaasartuutaavallaanngitsumillu periaaseqalersinnaallutik, Peter Bastrup oqarpoq.
Takornariartitsinermi isertitat aamma amerlisimasut, Nunatta Angalatitsivia A/S allappoq, tassami nunanit allanut takornariat Nunatsinnukartut 18 procentinik amerlisimammata.
- Kalaallit Nunaanni takornarianut aasaanerata sanatigut periarfissat takornariat aamma tappiffiginerulersimagaat aamma nuannaarutissaavoq. Takornariat assersuutigalugu ukioq manna upernaakkut Kalaallit Nunaannukartut siornamut naleqqiullugu 57 procentinik amerleriarsimapput, Peter Bastrup oqarpoq, nangillunilu:
- Paasissutissat pitsaasut tamakku Air Greenlandimi suliffeqarfiit allat peqatigalugit atorluarniarsarissavavut, takornarianut assigisaannullu aasaanerata saniatigut periarfissat ineriartortinniassallutigit, takornariat amerlisarnissaat anguniassallutigu, Nunatta Angalatitsivia A/S-ip pisortaanera Peter Bastrup, angalatitsiviup ukiumoortumik naatsorsuutaanut atatillugu ilaatigut oqarpoq.