Folketingimi ukioq aallarnerlugu Nunatsinnut tunngasut suliarileraat
Folketingimi ilaasortat 179-iusut sapaatit-akunnerata tulliani ataatsimiinnitik aallarteqqikkunikkit Nunatsinnut tunngasunik arlalissuarnik suliaqassapput.
Angajoqqaatut oqartussaaneq, angajoqqaatut akisussaaffeqarneq aammalu Nunatsinni katittarneq pillugu inatsisit ataatsimoortillugit Folketingimi januaarip 14-iani aappassaaneerneqassapput.
Taakkulu ilagaat suiaqatinoortut oqaluffimmi katissinnaanerat aammalu suiaqatinoortuunngitsut naligalugit suiaqatinoortut meeravissiartaarsinnaanissaat. Aammattaaq angajoqqaatut oqartussaaneq pillugu suliani meeqqat tusarniarneqarsinnaanerat meeqqallu angajoqqaamik avinnerini angajoqqaaminiissinnaatitaanissaat inatsisissatut siunnersuutinut ataatsimoortunut ilaapput.
Suliani angajoqqaatut oqartussaanermut tunngasuni meeqqanut tunngatillugu ilisimasalimmit siunnersorneqarsinnaatitaanissaq Folketingimi oqallinnermi maannamut sammineqarneruvoq.
Inatsisit ataatsimoortut tamakkerlugit Inatsisartuni upernaaq akuersissutigineqarput, inatsisilli Folketingimit januaarip 19-iani pingajussaaneerneqareerpata aatsaat atuutilersinneqarsinnaapput suliassaqarfiit pineqartut tamarmik danskinit akisussaaffigineqarmata.
Uranimik avammut nioqquteqarneq Danmarkip isumannaarusukkaa
Danskit naalakkersuisuisa Nunarput 2016-imi aamma immikkut sammissavaa. Danskit naalakkersuisuisa inatsisissatut siunnersuutinik marlunnik februaarimi saqqummiussaqarnissaat naatsorsuutigineqarpoq, taakkulu aqqutigalugit uranimik avammut nioqquteqarnermut tunngatillugu naalagaaffeqatigiit nunat tamalaat maleruagassaannik qulakkeerinninnissaat anguniarneqarpoq.
Tamatumunnga pissutaasoq tassaavoq Nunatsinni uranimik piianissamut naaggaarluinnarnerup 2013-imi atorunnaarsinneqarnerata kinguneranik naalagaaffeqatigiinni aatsitassanut qinngornernik ulorianartunik akulinnut naaggaarluinnarneq unioqqutinneqarmat.
Danskit naalakkersuisuisa siunnersuuteqarnerisigut uranip Nunatsinneersup unioqqutitsilluni sakkussiassanik nioqquteqarnermut imaluunniit atomimik sakkussiornermut atorneqannginnissaa ilaatigut qulakkeerniarneqarpoq.
Kalaallit meerartaasa atugaat oqallisigissavaat
Kingullertullu, minnerunngitsumillu, Nunatsinni meeqqat atugaat Folketingimi januaarip 22-ani kingumut oqallisigineqassapput.
Dansk Folkepartiip Kalaallit Nunaannut tunngasunut oqaaseqartartua Søren Espersen apeqquteqaateqartuuvoq, matumanilu Meeqqat illersuisuata MIO-meersup Qaasuitsup Kommuniani meeqqat ilarpassuisa atugaannik isornartorsiuinera aallaavigineqassaaq.
Meeqqat illersuisuata isornartorsiuteqarnerata kingorna Espersenip siunnersuutigisimavaa Nunatsinni isumaginninnermut oqartussaaffik Danmarkimit tigugallarneqartariaqartoq, tamannali ilaqutariinnermut, naligiissitaanermut isumaginninnermullu naalakkersuisumit Martha Lund Olsenimit (S) itigartitsissutigineqarpoq.
