Nunatsinnut suliartorusuttut amerleriarput
Nunatta avataaniit Nunatsinnut suliartorusuttut ukiormanna amerleriarput. Ingammik Danmarkimi Jyllandimeersut Fynimeersullu Nunatsinnut suliartornissaminnut soqutiginnipput.
- Ukiup affaani kingullermi nittartagarput pisarnermit annerusumik soqutigineqarpoq. Tassa suliffissarsiortut siornatigumut sanilliullugit amerleriangaatsiaramik. Tamanna Danmarkimi suliffissarsiortut amerleriarnerannut attuumassuteqaqqooqaaq, Peter Rasmussen, NextJobGreenlandimi piginneqataasoq, oqarpoq.
Nextjobgreenlandip kalaallit suliffeqarfii, Danmarkimi sulisussarsiortut sullillugit, 2006-imili nittartakkakkut sulisussarsiuuttarpai.
Nextjobgreenlandimit maluginiarneqarsimavoq Jyllandimeersut Fynimeersullu Nunatsinnut suliartorusunnerusartut:
- Taakku meeqqat atuarfiat naammassigaangamikku ilinniarnertuunngorniarfimmi atualertussanngoraangamik illoqarfimmut annerusumut nuuttariaqartarput. Qaffasinnerusumillu ilinniagaqassagaangamik nuuttussanngoqqittarput soorlu Aalborgimut, Odensemut imaluunniit Københavnimut. Taamaalillutik Københavnimiunut allamut nooqqaanngikkaluarlutik ilinniakkaminnik naammassinnissinnaasunut sanilliullutik, immaqa allamut nuunnissaminnut nangaassuteqannginnerusarput, Peter Rasmussen oqarpoq.
Ilanngullugu Nextjobgreenlandimit maluginiarneqarsimavoq Kalaallit Nunaannut nuukkusuttut apeqqutit pingasut akissutissarserusuttaraat:
- Inissiat illulluunniit najugaqarfissatik qanoq innersut, akileraarutinut tunngasut Danmarkimilu ilaquttaminnik qanoq attaveqartuaannarsinnaanertik paaserusuttaqaat, Peter Rasmussen oqarpoq.
Akerlianilli Kalaallit Nunaaliarusunnginnermut ataaseq patsisaasarpoq:
- Isummat pigiliutiinnakkat pissutigalugit Kalaallit Nunaaliarusunneq ajorput. Tassami amerlaqisut suli isumaqarput ukioq kaajallallugu taartuaannarlunilu 40 gradit angullugit issittartoq. Tamatuma peqatigisaanik tusagassiorfiit Kalaallit Nunaat avaanngunartumik eqqartussallugu nuannarisaqaat, soorlu imminut toquttarneq imigassamillu ajornartorsiuteqarneq oqaluttuariumasaqalugit, Peter Rasmussen oqarpoq.
Tamanna uggornartuusoq Peter Rasmussen isumaqarpoq, tamannali aamma immaqa nammineq pisuussutigineqartoq oqartoqarsinnaavoq:
- Kalaallit Nunaat tunniussassarpassuaqarpoq, tamakkuli qallunaanut oqaluttuarinissaat immaqa pikkoriffigineqarpallaarsimanani, Peter Rasmussen naggasiivoq.
