Nunatsinnut nuuttut Memrise atorlugu kalaallisut ilinniarsinnaalerput
- Oqaatsinik 1000-inik ilikkarsimallunga Facebookikkut tanngassimaarutigigakku uisaallattut paasisaqarusuttullu amerlaqaat, Mette Bank Sørensen oqarpoq.
Memrise iserfigalugu akeqanngitsumik ilaasortanngortoqarsinnaavoq, oqaatsillu ilikkarsimasat pillugit misiliisoqarsinnaavoq, qassit angusimanerlugit paasiniarneqarsinnaalluni, pikkorissaqatit ikinngutillu unammeqatigineqarsinnaallutik, soorlu aamma oqaatsit qassit unammeqatigisat sapaatip-akunnerani qaammatilluunniit ataatsip ingerlanerani ilikkagaqarsimanersut takuniarneqarsinnaalluni.
Oqaatsilli 1000-it amerlagisassaanngitsut, Mette Bank Sørensenip nassuerutigaa, tassami nunani allaneersuulluni kalaallisut oqaatsit ilikkaruminaassinnaasarmata:
- Oqaatsit 1000-it amerlagisassaanngillat, uannulli allannguuteqartitseqaat, inuit kalaallisut oqaluttut suna oqallisigineraat paasisinnaalerpara. Ukiup affaa matuma siorna oqaluttut paasisinnaanngilakka, siumulli ingerlaninni oqaaseeqqat oqaatsillu naaneri paasisinnaaleriartuaarpakka, Mette Bank Sørensen oqarpoq.
Memrise atorlugu oqaatsinik pikkorissarneq aqqutigalugu ilinniartut ilisimasaat atoriaannaat pitsanngorsimatigineri Oqaatsinik Pikkorissarfimmi oqaatsinik ilinniartitsisup Drude Aviaajap malugisinnaalluarnerarpaa.
